Blaðsíður: 1 ... 2 3 4 5 ...6 ... 8 ...10 ...11 12 13

11.08.08

  17:45:32, Skrásetjari: Ragnar Geir Brynjólfsson   , 116 orð  
Flokkur: Erlendar fréttir úr heimi kirkjunnar

Filippseyjar: Uppreisnarmenn múslima hertaka kristin þorp

Asianews.it - Filippseyjar. Meira en 800 skæruliðar Moro frelsishers islam (MILF) hafa hertekið 15 þorp kristinna í Norður-Cotabato héraði á Mindanao, stærstu eyju Filippseyja. Stjórnarher Filippseyja hefur hafið gagnárás á skæruliðana. Um 20 manns eru fallnir og meira en 130 þús. eru á flótta bæði kristnir og múslimar. Rauði krossinn hefur hafið sendingar á lyfjum, mat og drykkjarvatni til svæðisins. [Tengill] Nýlega hafnaði hæstiréttur Filippseyja samkomulagi sem stjórn Filippseyja gerði við skæruliðasamtökin. Ágreiningur er því um landamæri sjálfsstjórnarsvæðis múslima. Biskupar kaþólsku kirkjunnar hafa gagnrýnt að efni samkomulagsdraganna skyldi ekki hafa verið birt almenningi.

09.08.08

  22:53:36, Skrásetjari: Ragnar Geir Brynjólfsson   , 161 orð  
Flokkur: Önnur trúarbrögð, Erlendar fréttir úr heimi kirkjunnar

Indónesía: Þúsundir kristinna mótmæla sharia

Asianews.it. Jakarta. Í Jayapura, höfuðborg indónesísku Papúa hafa meira en 3500 kristnir mótmælt upptöku sharia laga í héraðinu. Orðrómur er um að sharia verði komið á en mótmælendurnir halda fram að héraðið njóti sjálfsstjórnar og slík lög verði ekki innleidd nema með samþykki héraðsbúa. Í Padang höfuðborg Vestur-Súmötru minnir ástandið æ meir á íslamskt ríki. Kvenstúdentar sem ekki bera slæðu eru gjarnan reknir tímabundið úr skóla. Ákvæði frá 2005 um að virða skuli reglur islam er látið gilda fyrir aðra en múslima. Upptaka sharia líkra lagaákvæða í héruðum Indónesíu sést æ oftar og ríkisstjórnin hefur ekki staðið í vegi fyrir því þrátt fyrir mótmæli frá trúarlegum minnihlutahópum sem og mannréttindahópum. [Tengill1] [Tengill2]

07.08.08

  17:26:32, Skrásetjari: Ragnar Geir Brynjólfsson   , 55 orð  
Flokkur: Erlendar fréttir úr heimi kirkjunnar

Nígería: Aukið misrétti og ofbeldi gagnvart kristnum

indcatholicnews.com. Nýverið bárust fréttir af því að vísbendingar um kerfisbundið misrétti og ofbeldi gegn kristnum ætti sér stað í Norður-Nígeríu. Fregnir berast af árásum og eyðileggingu kirkna sem og brottnámi ungmenna í þeim tilgangi að fá þau til að snúast til islam. [Tengill]

01.08.08

  08:36:30, Skrásetjari: Ragnar Geir Brynjólfsson   , 87 orð  
Flokkur: Samkirkjuleg málefni, Erlendar fréttir úr heimi kirkjunnar

Kasper kardínáli: Sambandið við Anglíkana í hættu

Cwnews.com - London. Mikil átök innan anglíkönsku kirkjunnar um málefni sem lúta að vígslum homma og kvenna hafa sett samskiptin við anglíkönsku kirkjuna í hættu. Þetta kom fram í máli Kasper kardínála sem hann flutti á Lambeth ráðstefnu anglíkönsku kirkjunnar nýlega. [Tengill] Kardínálinn sagði að með gjörðum sínum þá tækju Anglíkanar sér stöðu með mótmælendum fremur en með kaþólskum og orþodoxum.

  08:19:58, Skrásetjari: Ragnar Geir Brynjólfsson   , 92 orð  
Flokkur: Erlendar fréttir úr heimi kirkjunnar

Jakarta: Nemendur guðfræðiskóla enn á hrakhólum eftir árás

Asianews.it - Jakarta. Nemendur og kennarar kristins guðfræðiskóla sem varð fyrir árás róttækra múslima 26. júní sl. eru enn á hrakhólum. Sumir fengu húsaskjól í þinghúsi, aðrir hjá lögreglunni og enn aðrir í kirkju. Ætlun þeirra er að fara með mál sitt fyrir mannréttindasamtök. Árásin var gerð af róttækum múslimum og að sögn skipulögð af fyrirtæki sem ásælist landið þar sem guðfræðiskólinn hafði aðsetur. [Tengill]

28.07.08

  13:22:40, Skrásetjari: Ragnar Geir Brynjólfsson   , 63 orð  
Flokkur: Erlendar fréttir úr heimi kirkjunnar

Talsmaður Páfagarðs svarar opnu mótmælabréfi

Catholicnews.com. Í svari sínu við opnu bréfi kaþólskra mótmælahópa sem birtist í ítalska dagblaðinu Corriere della Sera 25. júlí sl. sagði talsmaður Páfagarðs að stefna kirkjunnar hvað varðar tilgerðar getnaðarvarnir væri óbreytt og að athyglisvert væri að orðið „kærleikur“ kæmi ekki fyrir í bréfinu. [Tengill]

27.07.08

  09:02:53, Skrásetjari: Ragnar Geir Brynjólfsson   , 108 orð  
Flokkur: Páfinn

Benedikt páfi: „Það er ekki auðvelt að vera grænn“, en það er hluti af áætlun Guðs

Catholicnews.com. Jóhannes Páll II páfi var útivistarmaður en Benedikt XVI páfi virðist ætla að marka spor sem „græni páfinn“. Í heimsókn sinni til Ástralíu í tilefni af Heimsdegi æskunnar notaði hann tækifærið til að kynna hugmyndirnar sem að baki liggja. Í Ölpunum í fyrra sagði hann að umhverfisvitund ungs fólks væri fyrsta skrefið í þá átt að trúa því að sköpunarverk Guðs þyrfti að virða. Næsta skrefið væri skilningur á því að 'okkur bæri ekki aðeins að virða jörðina heldur hvert annað'.

[Tengill á frétt catholicnews.com]

26.07.08

  11:23:33, Skrásetjari: Ragnar Geir Brynjólfsson   , 108 orð  
Flokkur: Önnur trúarbrögð, Erlendar fréttir úr heimi kirkjunnar

Múslimar á Filippseyjum fordæma hótunarbréf

Asianews.it. Múslimskir hópar á Filippseyjum hafa fordæmt nýlegt hótunarbréf sem kaþólski biskupinn í Basilan einni eyja Filippseyja fékk föstudaginn 18. júlí sl. Í bréfinu var biskupinum tilkynnt að hann fengi 15 daga frest til trúskipta eða greiðslu verndarskatts. Biskupinn segir þetta ekki vera einu hótunina sem hann hefur fengið. Basilan er hluti af sjálfstjórnarhéraði múslima (ARMM)* sunnarlega í eyjaklasanum. Fyrr á þessu ári voru um 1200 kristnir bændur flæmdir brott frá svæðinu á þeim forsendum að forfeður múslima hefðu átt landið.

* ARMM er skammstöfun á 'Autonomous Region in Muslim Mindanao'.

24.07.08

  21:19:25, Skrásetjari: Ragnar Geir Brynjólfsson   , 67 orð  
Flokkur: Páfinn, Erlendar fréttir úr heimi kirkjunnar

Benedikt páfi: Kristin trú hamlar skaðlegum áhrifum afstæðishyggju

Asianesws.it. Benedikt páfi XVI sagði í nýlegu ávarpi sínu til ástralskra ungmenna á Heimsdegi æskunnar að kristin trú væri andsvar gagnvart 'eitri' afstæðishyggjunnar sem mengaði sköpunarverkið og smækkaði ungt fólk niður í það að verða einungis neytendur. Hann talaði einnig um boðunarhlutverk gagnvart þeim sem ekki hafa tekið kristna trú.

Sjá hér: [Tengill]

23.07.08

  09:17:31, Skrásetjari: Ragnar Geir Brynjólfsson   , 90 orð  
Flokkur: Lífsvernd

Lög í Suður Dakóta: Konur verði upplýstar um að þær séu að „binda enda á líf mannveru“

Lifesitenews.com. Á föstudaginn var gengu í gildi ný lög í Suður Dakóta sem kveða á um að konur á leið í fósturdeyðingu verði upplýstar um að þær séu að „binda enda á líf mannveru“. Samtökin Planned Parenthood höfðu reynt að hindra framgang þessarar lagasetningar en án árangurs. Lögin kveða einnig á um að konurnar verði upplýstar um að þær séu viljandi að fara í aðgerð sem auki líkur á þunglyndi og sjálfsvígum. Sjá hér: [Tengill]

10.07.08

  23:59:22, Skrásetjari: Ragnar Geir Brynjólfsson   , 101 orð  
Flokkur: Erlendar fréttir úr heimi kirkjunnar

Tyrkneska ríkið tapar máli í Strassbourg

Tyrkneska ríkið tapaði nýlega máli sem samkirkjulegri patríarkinn af Konstantínópel (í Istanbúl) höfðaði fyrir mannréttindadómstólnum í Strassbourg. Ríkið hafði tekið munaðarleysingjahæli sem kirkjan átti eignarnámi og það var dæmt til að skila því aftur. Með dómnum fær patríarkatið alþjóðlega viðurkenningu sem lögaðili og má því eiga eignir. Hingað til hafa trúarlegir minnihlutahópar í Tyrklandi ekki haft stöðu lögaðila og hafa því ekki mátt eiga eignir.

Sjá nánar á Asianews.it

29.06.08

  15:27:34, Skrásetjari: Ragnar Geir Brynjólfsson   , 1206 orð  
Flokkur: Þjóðfélagsrýni, Önnur trúarbrögð

Um íslamismann, naívismann og guðlastsákvæðin

Fyrir nokkru las ég bókina Íslamistar og naívistar eftir Danina Jespersen og Pittelkow en hún kom út hér á landi í fyrra. Bókin er í heild sinni athyglisverð og upplýsandi m.t.t. íslamisma og er ekki að sjá galla í efnistökum hennar á því sviði enda hafa höfundarnir aflað sér heimilda víða eins og sjá má á ítarlegri tilvísanaskrá og heimilda eða ritaskrá.

Ég ætla ekki að endurtaka það sem í bókinni stendur endar er ég flestu sammála þar hvað varðar greiningu höfundanna á ástandi mála en renni örstutt yfir þau hugtök sem þar eru notuð. Íslamisma þekkja flestir og hann þarf varla að kynna en höfundarnir nota naívisma í merkingu yfir þá Vesturlandabúa sem hafa lítinn metnað fyrir eigin menningu og telja að gefa beri eftir á flestum sviðum þar sem viðhorf íslam mæta Vestrænni menningu.

Read more »

21.05.08

  22:14:41, Skrásetjari: Ragnar Geir Brynjólfsson   , 965 orð  
Flokkur: Páfinn, Önnur trúarbrögð

Krefst páfinn tilbeiðslu allra manna?

Á dögunum barst mér í hendur bókin „Deilan mikla milli Krists og Satans“ eftir Ellen G. White sem gefin er út af Frækorninu - bókaforlagi Aðventista í Reykjavík. Eintakið sem ég er með í höndunum er önnur útgáfa 2003. Í 3. kafla bókarinnar er miklu rými varið í ádeilu á rómversk-kaþólsku kirkjuna fyrr á öldum og páfadóminn eins og sjá má t.d. á blaðsíðu 34:

Þegar Konstantín gerðist kristinn að nafninu til á öndverðri fjórðu öld, vakti það mikinn fögnuð og heimshyggjan gekk inn í kirkjuna sveipuð sýndarréttlæti. Nú komst skriður á spillinguna. Heiðindómurinn sem í orði kveðnu átti að heita sigraður var hinn raunverulegi sigurvegari. Andi hans réð lögum og lofum í kirkjunni. Heiðnar kenningar, siðir og hindurvitni voru felld inn í trúariðkanir og tilbeiðslu þessara svonefndu fylgjenda Krists. Málamiðlunin milli heiðindóms og kristni hafði í för með sér tilkomu „manns syndarinnar“ sem spáð hafði verið að koma mundi til að berjast gegn Guði og hreykja sér yfir hann. Þetta risavaxna kerfi falstrúar er meistaraverk valds Satans ..

Read more »

03.05.08

  22:37:53, Skrásetjari: Ragnar Geir Brynjólfsson   , 137 orð  
Flokkur: Helgir menn, Erlendar fréttir úr heimi kirkjunnar

Focolare hreyfingin telur nú 2 milljónir meðlima

Chiara Lubich

Focolare hreyfingin sem Chiara Lubich stofnaði telur nú um 2 milljónir meðlima í yfir 180 löndum. Þetta kemur fram á asianews.it.
Chiara Lubich fékk köllun sína vegna reynslu sem hún varð fyrir í síðari heimsstyrjöldinni og fljótlega myndaðist hreyfing í kringum hugmyndir hennar sem fengu kirkjulega viðurkenningu fyrst árið 1947.

Read more »

27.04.08

  13:05:32, Skrásetjari: Ragnar Geir Brynjólfsson   , 228 orð  
Flokkur: Helgir menn, Erlendar fréttir úr heimi kirkjunnar

Líkami Padre Pio til sýnis

Greint var frá því í liðinni viku að jarðneskar leifar ítalska prestsins og dýrlingsins Padre Pio (1887-1968) væru nú til sýnis þangað til í september 2009 í ítalska bænum San Giovanni Rotondo. Lík prestsins er í glerkistu en það var tekið úr hvílu sinni hinn 3. mars sl. 40 ár eru liðin frá dauða prestsins en hann vakti mikla athygli og virðingu á Ítalíu og víða um heim á meðan hann lifði sem heilagur maður, skriftafaðir og predikari því þúsundir manna vitnuðu um kraftaverk eftir að hafa átt fund með honum. Einnig vakti athygli við Padre Pio að frá árinu 1918 og til dauðadags 1968 var hann með sár á höndum og fótum og voru þessi sár af mörgum talin vera hið svokallaða 'stigmata' fyrirbæri eða eftirmyndir sára Krists.

Read more »

14.04.08

  22:19:10, Skrásetjari: Ragnar Geir Brynjólfsson   , 386 orð  
Flokkur: Lífsvernd, Erlendar fréttir úr heimi kirkjunnar

Skoskur kardínáli varar við stofnfrumufrumvarpi á YouTube

Keith O'Brien kardínáli í Skotlandi hefur nýtt YouTube til að vara við frumvarpi bresku stjórnarinnar um stofnfrumur "Human Fertilisation and Embryology Bill". Í 5 mínútna löngu myndskeiði sem hann sendi öllum þingmönnum Bretlands endurtekur hann andstöðu sína við það að búa til frumublendinga manna og dýra. Sjá má erindi kardínálans hér:

Read more »

27.03.08

  21:25:27, Skrásetjari: Ragnar Geir Brynjólfsson   , 135 orð  
Flokkur: Erlendar fréttir úr heimi kirkjunnar

Kínverskir embættismenn staðfesta viðræður við Páfagarð

Kaþólska kirkjublaðið greinir frá því að talsmenn kínverskra stjórnvalda hafi staðfest að þeir eigi í viðræðum við Páfagarð með það að markmiði að bæta sambandið og koma á stjórnmálasambandi. „Kínverjar setja tvö skilyrði. Áður en unnt verði að koma á stjórnmálasambandi verður Vatíkanið að slíta stjórnmálatengsl sín við Taívan og viðurkenna rétt Kínverja til að stjórna aþjóðasamskiptum kaþólsku kirkjunnar þar“. Í fréttinni kemur fram að Páfagarður sé reiðubúinn að slíta stjórnmálatengsl sín við Taívan en geti ekki sætt sig við yfirráð „aðila sem hefur verið þröngvað upp á“ kirkjuna.

Kaþólska kirkjublaðið 18. árg. 4. tbl. bls. 8.

15.03.08

  21:30:54, Skrásetjari: Ragnar Geir Brynjólfsson   , 331 orð  
Flokkur: Kenning kirkjunnar

Misskilningur fjölmiðla í viðtalinu við Girotti erkisbiskup

Nýlegar furðufregnir um að Páfagarður hafi skilgreint sjö nýjar dauðasyndir sem annað hvort áttu að bætast við þær hefðbundnu sjö sem fyrir voru eða skipta þeim alveg út voru byggðar á viðtali við Girotti erkibiskup sem birtist í málgagni Páfagarðs. Það sem fjölmiðlamenn misskildu í málinu var að halda að embættismaður í Páfagarði gæti gefið út nýjar kenningar fyrir kirkjuna. Almennur lesandi þessara fregna hefði því getað haldið að synd í kaþólskum skilningi væri ekkert annað en brot á reglum sem hópur manna í Páfagarði hefði samið. Í anda þess misskilnings væri synd háð duttlungum þeirra manna sem þar réðu hverju sinni. Sjá má glöggt dæmi þess misskilnings hér: [1]

Read more »

13.03.08

  16:25:53, Skrásetjari: Ragnar Geir Brynjólfsson   , 194 orð  
Flokkur: Erlendar fréttir úr heimi kirkjunnar

Dellufrétt um nýjar dauðasyndir flýgur um heimsbyggðina

Sú fregn hefur flogið um heimsbyggðina að Kaþólska kirkjan sé búin að skilgreina nýjar dauðasyndir. Hér á Íslandi hafa menn einnig látið blekkjast af þessum furðufregnum og ekki hirt um að kanna málið frekar eða skoða heimildir sínar með gagnrýnum hætti. Fyrstir til að láta blekkjast hérlendis virðast hafa verið hinn góðkunni fjölmiðlamaður Jónas Kristjánsson á vefritinu jonas.is sem og ritstjórn vefritsins vantru.is sem vísar í pistil Jónasar. Þessi missögn er byggð á útúrsnúningi á orðum Gianfranco Girotti erkibiskups í viðtali við málgagn páfagarðs L'Osservatore Romano og virðist breska dagblaðið The Daily Telegraph eiga hinn vafasama heiður að verða fyrst með dellufréttina sem sjá má hér. „Eitt af því sem Girotti erkibiskup hélt fram var að nútíminn skildi ekki eðli syndarinnar. Þessi fjölmiðlauppákoma virðist því óvart hafa undirstrikað það sem erkibiskupinn hélt fram" sagði í vefritinu Catholic World News í umfjöllun um málið sem lesa má hér.

03.03.08

  20:53:26, Skrásetjari: Ragnar Geir Brynjólfsson   , 1033 orð  
Flokkur: Trúarpælingar

Af hverju gefur Guð okkur ekki Mercedes Benz?

Flestir kannast við lagið fræga með Janis Joplin þar sem Guð er beðinn um að gefa glæsibíl af Mercedes Benz gerð, litasjónvarp og fleira skemmtilegt. Hægt er að fylgjast með flutningi hennar á laginu á þessum YouTube tengli hér. En af hverju gefur Guð okkur sem biðjum ekki Mercedes Benz eða bara uppfyllir allar óskir okkar eins og skilja mætti af Jóhannesarguðspjalli 14. kafla, versunum 13-14?

Read more »

12.02.08

  20:28:03, Skrásetjari: Ragnar Geir Brynjólfsson   , 147 orð  
Flokkur: Helgir menn, Trúin og menningin

Um helgimyndir

„Það er staðreynd að jafnvel elstu katakomburnar (neðanjarðarhvelfingar), þar sem kristnir menn komu saman, voru skreyttar myndum af Kristi og helgum mönnum. Sá siður hefur verið við líði allt frá dögum frummanna að gera myndir af þeim sem þeim þótti vænt um og þeir mátu mikils, einkum látum mönnum. Svokallaðir 'myndbrjótar' vitna ævinlega í Gamla testamentið, sem banni slíka myndagerð. En í því sambandi gleymist þeim að lögmál Gamla testamentisins um guðsdýrkun féll úr gildi þegar hinn nýi sáttmáli kom til sögunnar...

Read more »

10.02.08

  11:23:32, Skrásetjari: Ragnar Geir Brynjólfsson   , 511 orð  
Flokkur: Trúarpælingar, Fasta og yfirbót, Fastan

Hinar þrjár freistingar Krists í eyðimörkinni

Í upphafi 4. kafla Mattheusarguðspjalls er greint frá því þegar Kristur hélt út í eyðimörkina og fastaði þar í 40 daga og nætur og 'var þá orðinn hungraður'. Þegar þar var komið sögu vitjaði djöfullinn hans og freistaði hans þrisvar sinnum. Hin fyrsta freisting var sú að hann skyldi breyta brauði í steina, önnur freistingin var sú að hann skyldi kasta sér af brún musterisins og koma niður óskaddaður, borinn af englum. Þriðja freistingin var sú að djöfullinn lofaði að gefa honum öll ríki jarðarinnar ef hann félli fram og tilbæði sig.

Read more »

07.02.08

  19:36:49, Skrásetjari: Ragnar Geir Brynjólfsson   , 276 orð  
Flokkur: Fasta og yfirbót, Fastan

Fastan - hin andlega eyðimerkurferð

Sá bankareikningur sem einungis er tekið út af tæmist að lokum. Sú veisla sem engan enda tekur verður á endanum óbærileg. Við höldum upp á bolludag og troðum okkur út af bollum og svo á eftir kemur sprengidagur og þá borðum við eins mikið af kjöti og við getum. En hvað svo? Jú síðar koma páskarnir og þá er hægt að láta eins mikið af súkkulaði í sig og maginn leyfir en hvað svo. Jú svo kemur hvítasunnan, og svo verslunarmannahelgin og svo aftur jólin. Vissulega eru þessi veisluhöld sjálfsögð og góð og þau eiga sinn tíma. En það á líka fastan.

Read more »

06.02.08

  22:23:47, Skrásetjari: Ragnar Geir Brynjólfsson   , 163 orð  
Flokkur: Fasta og yfirbót, Fastan

Öskudagur - öskudagsmessa og öskukross

Á öskudag hefst 40 daga fasta kristinna manna og hún stendur fram á páskadag. Í kaþólsku kirkjunni er til siðs að fara í messu á öskudag og í lok messunnar gerir presturinn krossmark úr ösku á enni kirkjugesta og mælir um leið þessi orð: "Minnstu þess maður að þú ert mold og að moldu muntu aftur verða". Þetta minnir fólk á hverfulleika lífsins og fallvölt gæði þessa heims.

Read more »

01.02.08

  17:38:46, Skrásetjari: Ragnar Geir Brynjólfsson   , 237 orð  
Flokkur: Trúin og menningin

Bragi - Óðfræðivefur - merkilegt framtak til miðlunar menningararfsins

Eins og kunnugt er eiga Íslendingar ekki aðgengilegar útgáfur af bestum trúarlegum skáldskap íslenskum fram að Hallgrími Péturssyni en þó hafa Norðmenn gefið sum þessara kvæða út í myndskreyttum hátíðarútgáfum í þýðingum, en nú hillir undir bragarbót í þessum málum. Undanfarin ár hefur Kristján Eiríksson verkefnisstjóri á handritasviði hjá Árnastofnun unnið að óðfræðivef á netinu. Ein eining vefjarins ber heitið 'Ljóðasafn' og er meiningin að safna smám saman í hana sem flestum ljóðum íslenskum sem ort hafa verið fyrir 1800. Slóðin á vefinn er http://tgapc05.am.hi.is/bragi/. Best er að byrja á að fara inn á "Bragþing" á neðri línu í haus og síðan inn á einstakar einingar.

Read more »

28.01.08

  19:40:28, Skrásetjari: Ragnar Geir Brynjólfsson   , 99 orð  
Flokkur: Erlendar fréttir úr heimi kirkjunnar

Filippseyjar: 20 biskupar hitta stjórnina til að ræða vanda fátækra

Vefsetrið Asianews.it greinir frá því að 20 biskupar á Filippseyjum hafi fundað með leiðtogum landsins í forsetahöllinni til að ræða áhyggjur þeirra fyrrnefndu af vaxandi bili milli ríkra og fátækra í landinu. Um 10% þjóðarinnar ná að taka til sín meira en þriðjung þjóðarteknanna á meðan um 60% draga fram lífið undir fátæktarmörkum. Meðaltekjur fjölskyldu á Filippseyjum eru núna um 12 dollarar á dag og fáar fjölskyldur ná að leggja nokkuð fyrir.

Sjá: http://www.asianews.it/index.php?l=en&art=11342&geo=39&size=A

27.01.08

  12:17:33, Skrásetjari: Ragnar Geir Brynjólfsson   , 552 orð  
Flokkur: Trúarpælingar

Um friðarboðskap kristninnar 6. hluti: Gullna reglan

Eitt merkasta framlag kristninnar til siðfræði og því innri og ytri friðar er hennar útgáfa af Gullnu reglunni svokölluðu en hún er sett fram á tveim stöðum í Nýja testamentinu. Fyrri staðurinn er í Matteusarguðspjalli, 7. kafla, 12. versi:

Allt sem þér viljið að aðrir menn geri yður, það skuluð þér og þeim gera. Því að þetta er lögmálið og spámennirnir.

og hinn síðari er í Lúkasarguðspjalli 6. kafla, 31. versi þar sem segir:

Og eins og þér viljið að aðrir menn geri við yður, svo skuluð þér og þeim gera.

Read more »

20.01.08

  20:45:57, Skrásetjari: Ragnar Geir Brynjólfsson   , 158 orð  
Flokkur: Erlendar fréttir úr heimi kirkjunnar

Fréttamolar úr heimi kaþólsku kirkjunnar

Páfi aflýsti áður fyrirhugaðri ræðu við setningu 'La Sapienza' háskólans í Róm vegna mótmæla sem 67 prófessorar höfðu staðið fyrir. Mótmælin voru að sögn vegna orða páfa sem hann lét falla sem kardínáli árið 1990 um að réttarhöldin yfir Galíleó hefðu á sínum tíma verið 'réttlát'. Vegna þessa dreif mikinn mannfjölda og háskólastúdenta, um 200 þúsund manns að sögn asianews.it til Péturstorgsins til að lýsa stuðningi sínum við páfa sjá hér. Ræðan sem hann hafði ætlað að halda er hér. Sjá einnig hér.

Tveir kaþólskir prestar urðu nýlega fyrir skotárásum. Einn á Filippseyjum sjá hér og hinn í Guatemala sjá hér.

Nýr yfirmaður Jesúítareglunnar hefur verið valinn. Sjá hér.

13.01.08

  18:23:06, Skrásetjari: Ragnar Geir Brynjólfsson   , 189 orð  
Flokkur: Erlendar fréttir úr heimi kirkjunnar

Tony Blair gengur í kaþólsku kirkjuna

Tony Blair fyrrum forsætisráðherra Bretlands gekk í kaþólsku kirkjuna hinn 21. desember síðastliðinn. Það var Cormac Murphy-O'Connor kardínáli sem framkvæmdi athöfnina.

Blair hafði sótt messu reglulega ásamt konu sinni Cherie og börnum þeirra. Áhugi hans á kaþólskri trú hefur komið skýrt í ljós á undanförnum árum og orðrómur um hugsanleg skref hans í þessum málum blossuðu upp í júní síðastliðnum þegar hann hitti Benedikt páfa XVI á einkafundi rétt áður en hann sagði af sér embætti.

Nýjar tölur frá Bretlandi sýna að flestir af þeim sem sækja kirkju reglulega þar í landi eru kaþólskir. Um 860 þúsund kirkjugesta sækja kaþólskar messur en 852 þúsund sækja messur anglíkana. Þetta gerist þrátt fyrir að messusókn meðal kaþólskra hafi fallið úr um 2 milljónum á 7. áratugnum. Innflutningur fólks frá kaþólskum löndum hefur þó snúið þessari þróun eitthvað við. Kirkjusókn anglíkana hefur á sama tíma hrapað stöðugt.

(CWNews.com) http://www.cwnews.com/news/viewstory.cfm?recnum=55541

03.01.08

  09:11:09, Skrásetjari: Ragnar Geir Brynjólfsson   , 212 orð  
Flokkur: Fjölmiðlarýni, Þjóðfélagsrýni, Kaþólska kirkjan á Íslandi, Páfinn

Forsætisráðherra fer lofsamlegum orðum um kaþólsku kirkjuna í áramótaávarpi

Forsætisráðherra Geir Haarde fór lofsamlegum orðum um kaþólsku kirkjuna í áramótaávarpi sínu sem sjónvarpað var á gamlárskvöld kl. 20. Í ávarpinu greindi hann m.a. frá ferð sinni til Páfagarðs síðastliðið haust og sagði:

Á liðnu hausti átti ég þess kost, ásamt konu minni, að heimsækja páfagarð. Það varð okkur ákaflega minnisstæð ferð. Ekki það eitt að eiga fund með páfanum, þeim sem nú fer með embættisstaf sjálfs Péturs postula og er trúarleiðtogi um þúsund milljóna manna, heldur líka að ganga um gáttir þess veraldarundurs sem Vatikanið og hallir þess eru. Þar snertir maður söguna við hvert fótmál. Kaþólska kirkjan er tæplega 2000 ára gömul stofnun og oft hefur um hana blásið. En henni hefur líka fylgt mikil blessun, hún er sterk og á djúpar rætur. Margir landar okkar eru kaþólskir og hafa hér öflugan söfnuð, sem margt gott hefur látið af sér leiða. Við heilsum nýjum kaþólskum biskupi, sem vígður var fyrr í þessum mánuði, og óskum honum heilla í starfi.[1]

[1] http://www.forsaetisraduneyti.is/radherra/raedurGHH/nr/2830

02.01.08

  15:32:54, Skrásetjari: Ragnar Geir Brynjólfsson   , 161 orð  
Flokkur: Forvarnir

Er kirkjusókn og trúariðkun holl?

Svo virðist ef marka má nýlega frétt sem birtist á mbl.is þar sem segir m.a.: „Trúariðkun er einnig til bóta. Konum sem hættu trúariðkun reyndist mun hættara við kvíða og misnotkun áfengis.“ [1] Fréttin er byggð á heimild af vefnum livescience.com [2]. Í þeirri heimild var einnig vísað í aðra rannsókn frá 2006 þar sem kemur fram að andardráttur þeirra sem sækja kirkju er léttari en hinna og ekki var hægt að skýra þetta út frá reykingum eða íþróttaiðkun. [3]. Þar er svo aftur vísað á þriðju könnunina frá því í apríl 2006 en í henni kom fram tengsl milli kirkjusóknar og lengra lífs. [4]

[1] http://www.mbl.is/mm/frettir/taekni/2008/01/02/truaridkun_og_hjalplegur_eiginmadur_draga_ur_streit/
[2] http://www.livescience.com/health/080101-women-stress.html
[3] http://www.livescience.com/health/061129_church_breathe.html
[4] http://www.livescience.com/health/060403_church_good.html

30.12.07

  14:44:15, Skrásetjari: Ragnar Geir Brynjólfsson   , 400 orð  
Flokkur: Páfinn, Jólin

Páfi fordæmir vopnagný og ofbeldi

Í Urbi et orbi (til borgarinnar og heimsins) boðskap sínum á jóladag fordæmdi páfi m.a. síendurtekna beitingu vopna á hinum ýmsu ófriðarsvæðum heimsins sem og hryðjuverk og ofbeldi. Sjá hér: [Tengill]

Segja verður að boðskapur páfa er sem fyrr tímabær og þarfur. Ef horft er á hina vestrænu menningu þá verður að viðurkenna að vopnadýrkun og ofbeldisdýrkun er áberandi, sumir myndu segja of áberandi. Afþreyingarefni, bæði tölvuleikir og myndefni byggir gjarnan á ofbeldi og vopnabeitingu til að byggja upp spennu. Oft - allt of oft er réttlætið sýnt sem afleiðing af vopnabeitingunni. En friður dauðans er ekki það sama og hinn sanni friður hjartans sem byggir á innri sátt og fyrirgefningu.

Read more »

29.12.07

  09:26:21, Skrásetjari: Ragnar Geir Brynjólfsson   , 1230 orð  
Flokkur: Fjölmiðlarýni

Jólasjónvarpið - hugsað upphátt

Þó sá sem hér heldur á penna hafi oft gagnrýnt RÚV sjónvarpið fyrir hitt og annað þá verður að segjast að dagskráin á aðfangadagskvöld jóla var ein sú allra besta með tilliti til trúarlegra dagskrárliða sem þessi ritari man eftir. Á eftir hefðbundum upplestri Helga Skúlasonar á 'Nóttin var sú ágæt ein' og söng Sigríðar Ellu kom dagskrárliður með völdum jólalögum úr dagskrá sjónvarpsins frá liðnum árum. Þarna var efni sem greinilega var vel tímabært að endurflytja og þó fyrr hefði verið.

Þar á eftir kom upptaka með söng Mormónakórsins og Sissel Kyrkjebø ásamt hljómsveit á jólatónleikum. Upptakan og öll umgjörð þeirra tónleika sem og listrænn flutningur var með einstökum glæsibrag. Sissel sýndi þarna að hún er sérlega sterkur listamaður og segja má að hún sé á hátindi frægðar sinnar. Tónleikarnir voru liðlega klukkustund og af þeim tíma var hún í nærmynd stóran hluta tímans - að vísu þó með dálitlum frímínútum. Þrátt fyrir þetta var túlkun hennar lýtalaus og stórkostleg án afláts og krafturinn að því er virtist ótakmarkaður. Hún söng þarna nokkra af hinum vinsælustu og þekktustu jólasálmum.

Read more »

25.12.07

  12:03:50, Skrásetjari: Ragnar Geir Brynjólfsson   , 172 orð  
Flokkur: Helgir menn, Páfinn, Jólin

„Jólin eru hátíð hinnar endurreistu sköpunar“

Þetta kom m.a. fram í jólapredikun Benedikts páfa XVI sem hann hélt í Péturskirkjunni í gærkvöldi. Þar lagði hann út af túlkun hl. Gregoríusar af Nyssa á jólaguðspjallinu en samkvæmt henni táknar jatan heiminn. Páfi spurði hvað hl. Gergorius hefði sagt hefði hann séð ástand heimsins í dag t.d. vegna misnotkunar á orku. „Koma Krists endurvekur fegurð og virðingu sköpunarinnar og heimsins“ sagði páfi og bætti vð að jólin væru því hátíð hinnar endurreistu sköpunar. „Hvort sem við erum fjáhirðar eða 'vitringar' þá er ljósið og þau skilaboð sem það flytur að fara og hitta Drottin og tilbjiðja hann. Við tilbiðjum hann með því að opna heiminn fyrir sannleikanum, fyrir hinu góða, fyrir Kristi, í þjónustu við þá sem settir eru til hliðar og það er í þeim sem hann bíður okkar.“

Sjá nánar á slóðinni: http://www.zenit.org/article-21389?l=english

21.12.07

  09:29:02, Skrásetjari: Ragnar Geir Brynjólfsson   , 545 orð  
Flokkur: Þjóðfélagsrýni, Kaþólska kirkjan á Íslandi, Önnur trúarbrögð

Trúin og skólinn

Á bloggsíðu séra Svavars Alfreðs Jónssonar sóknarprests í Akureyrarkirkju hafa nýverið spunnist talsverðar umræður um presta og heimsóknir þeirra í leik- og grunnskóla landsins. Sjá hér: [Tengill]. Sitt sýnist hverjum eins og gjarnan vill verða þegar umræður um skólamál eru annars vegar. Í stuttu innleggi sem ég lagði fram í athugasemdakerfinu þá kom ég því sjónarmiði á framfæri að umræðan snérist fyrst og fremst um skólamál þ.e. hvað eigi að gera í skóla og hvað ekki.

Read more »

1 ... 2 3 4 5 ...6 ... 8 ...10 ...11 12 13