| « Nýjasti hjartaknosari Danaveldis – ung kona með downseinkenni | „Og þú skalt elska Drottin, Guð þinn, af öllu hjarta þínu“ (Mk 12. 28-34) » |
08.03.08
„Stúdíur“ jafnaðarmannaforingjans Jóns Baldvins Hannibalssonar í Guðs voluðum heimi.
Þegar við bræðurnir vorum pattar (á Sigló voru smástrákar alltaf kallaðir pattar í gamla daga) voru bíóferðirnar á sunnudögum óaðskiljanlegur þáttur tilverunnar. Bíómyndirnar sjálfar snérust iðulega um eitt þema: Góða kalla og vonda kalla. Vondu kallarnir gerðu allt sem í þeirra valdi stóð til að „skemma allt“ fyrir góðu köllunum. Stundum fengum við bræðurnir gæsahúð af hryllingi þegar við sáum háttalag vondu kallanna og í einlægni sagt féllu stundum tár í laumi. Þetta var einföld lífssýn þar sem atburðarásin var sett fram í svörtu og hvítu. Svo er Guði fyrir að þakka að þroskinn hefur aukist með árunum og nú geri ég mér grein fyrir því að það eru bæði góðir kallar í liði vondu kallanna og vondir kallar í liði góðu kallanna.
Í útvarpinu á Rás 1 í gærkveldi greindi hinn mikli „jafnaðarmannaleiðtogi“ Jón Baldvin Hannibalsson frá „stúdíu“ sinni á s. l. vetri, en að hans sögn fólst hún í því að hyggja að framferði vondu kallanna á Spáni. Formúlan var sú sama og í bíóinu hjá okkur bræðrunum í gamla daga á Sigló. Í liði vondu kallanna eru hægri sinnaðir fasistar Francós og kirkjan. Þeir gera allt til að „skemma fyrir“ góðu köllunum, en þeir eru skoðanabræður Jóns Baldvins í stjórnmálum, það er að segja „jafnaðarmenn“ í hans skilningi. Þessi skilningur grundvallast á því að allir öðlist jafnan rétt til að taka þátt í lífskapphlaupinu mikla, en svo er það komið undir þeim sjálfum hver árangurinn verður.
Þetta varpar meðal annars ljósi á það að jafnaðarmannaleiðtoginn Jón Baldvin er á „ofureftirlaunum“ sem greidd eru úr vösum almúgans vegna þess að hann nýtti sér þá möguleika sem stóðu til boða en okkur hinum sást yfir. Basta! Eins og Jón Baldvin lýsti yfir í frægu blaðaviðtali fyrir ári síðan trúir hann ekki á „gamlar gyðingasögur“ eins og Jesú Krist. Hann skopast af „gyðingamýtum“ eins og þeirri sem greint er frá í 4. kafla Postulasögunnar þar sem meðlimum kirkjunnar er gert að deila eigum sínum með öðrum. Það er þetta sem góðu kallarnir í liði kirkjunnar gera, rétt eins og sumir vondu karlarnir í liði góðu karlanna hans Jóns Baldvins gera það ekki: Í þeirra huga eru sumir jafnari en aðrir, bæði hvað varðar lífslíkur og afkomu.
Jafnaðarmennska Jóns Baldvins nær heldur ekki til ófæddra barna fremur en Jose Luis Rodriguez Zapateros, núverandi forsætiðsráðherra Spánar. Hann er leiðtogi góðu kallanna hans Jóns Baldvins. Í viðtali í El Pais s. l. mánudag þegar síðustu skoðanakannanirnar voru birtar komst hann svo að orði: „Allt til síðustu stundar, þar til á miðnætti í dag, keppi ég eftir hreinum meirihluta til að stjórna.“
Samkvæmt skoðanakönnunum á mánudag hafði hann 4% meira fylgi en forystumaður vondu kallanna: Mariano Rajoy. Síðan þá hefur vantraust á hann aukist vegna skorts á einurð gegn hryðjuverkum ETA-manna. En hvernig sem úrslit kosninganna verða er afar hæpið að Zapatero nái hreinum meirihluta, þannig að samsteypustjórn virðist óhjákvæmileg. Það er eins gott að honum auðnist slíkt vegna þess að samkvæmt „stúdíu“ Jóns Baldvins ætla vondu kallarnir undir forsæti Mariano Rajoy að endurreisa alræði Francos og leiða spænsku þjóðina á vit miðaldanna að nýju vegna þrýstings frá kirkjunni.
Í „jafnaðarmannaríki“ þeirra Jóns Baldvins og Zapateros njóta ófædd börn einskis jafnræðis. Frelsið, jafnfréttið og bræðralagið nær einungis til þeirra sem þeir telja velþóknanlega þjóðskipulagi sínu. Aðrir hafa engan lífsrétt fremur en í Sovétríkjunum sálugu. Í lokin skulum við huga að því hvað lesa má um hlutverk kirkjunnar í heiminum sem nær einnig til ófæddra barna:
Með krossi sínum safnar Kristur saman öllum þeim sem eru sundraðir og tvístraðir
Kristur innsetti nýja sáttmálann, hið nýja testamenti, með blóði sínu (1Kor 11. 25) með því að safna saman fólki sem samanstóð af Gyðingum og heiðingjum og sameinaði það, ekki samkvæmt hyggju holdsins heldur Andans. Þetta átti að verða hinn nýi lýður Guðs . . . „útvalin kynslóð, konunglegt prestafélag, heilög þjóð, eignarlýður . . . sem áður var ekki lýður en eru nú orðinn ,Guðs lýður’“ (1Pt 2. 9-10).
Lýður Messíasar og þrátt fyrir að hann nái ekki til allra manna og líti á stundum út sem lítill hópur, er engu að síður varanlegt og öruggt sæði einingar, vonar og hjálpræðis öllu mannkyninu til handa. Sem samfélag lífs, kærleika og sannleika sem Kristur hefur grundvallað beitir hann því einnig sem tæki til að stuðla að endurlausn allra sem sent er til alls heimsins sem ljós hans og salt jarðar (Mt 5. 13) . . . Guð safnaði öllum þeim saman í eina heild sem horfa til Jesú í trú sem höfundar hjálpræðisins og uppsprettu einingar og friðar og gerði að kirkju sem er fyrir hvern og einn sýnilegt sakramenti einingar hjálpræðisins.
Jafnframt því að rísa yfir öll tímanleg takmörk og kynþáttagreiningu er kirkjunni ætlað að ná til allra afkima jarðarinnar og þannig verða að hluta mannkynssögunnar. Knúin áfram með þolraunum og þrengingum öðlast kirkjan styrk í náð fyrir kraft Guðs sem Drottinn gaf henni fyrirheit um þannig að hún hviki ekki frá fullkominni trúmennsku sinni í vanmætti mennsk holds, heldur haldi áfram að vera brúður verðug Drottins knúin áfram af Heilögum Anda og hætti aldrei að ganga í gegnum endurnýjun þar til hún kemur í krossinum til þess ljóss sem aldrei hnígur til viðar. (Lumen Gentium, 9)
Skelfileg tilhugsun er það ef tjald svartnættis „gamalla gyðingasagna“ fellur að nýju á Spáni og stöðvar framrás „jafnaðarmennsku“ þeirra Jóns Baldvins og Zapatreros. Er von nema sálararmingjanum mér hrylli við ásamt nafna mínum Hannibalssyni!!!
Í bíóinu á Sigló í gamla daga töpuðu vondu kallarnir alltaf. Er annað hugsanlegt í Guðs voluðum heimi? Vandamálið snýst einungis um eitt atriði: Hverjir eru vondu kallarnir og hverjir góðu kallarnir? Eða er hugsanlegt að málið sé örlítið snúnara?
5 athugasemdir
Heill og sæll, vinur. Og hjartans þakkir fyrir góðan og beinskeyttan pistil um heldur betur öfugsnúið viðtal við Jón Baldvin Hannibalsson í Speglinum hið fyrra kvöld. Ég heyrði einmitt viðtalið og féll næstum ketill í eld vegna óbilgirni hans gagnvart kirkjunni, svertingaráráttunni og (það sem mér þótti verst) að hann skyldi tala um fósturdeyðingar sem mannréttindamál kvenna!!! Fyrir allmörgum árum, raunar nokkrum áratugum, var þessi nafni minn nefnilega einn þeirra fáu alþingismanna, sem vildu ljá máls á því að þrengja ólögin frá 1975 um fósturdeyðingar (enn betri maður í því efni úr hans eigin vestfirzka jafnaðarmannahópi var Karvel Pálmason, verkalýðsfrömuður í Bolungarvík og sannur lífsverndarsinni). En hér bregzt Jón Baldvin algerlega og hefur upp falsraddaðan lofgjörðarsöng um “frjálslynda” siðleysið sem stjórn Zapateros innleiddi á Spáni, ásamt því að búa til nýjar fölsunargoðsagnir um illsku eða afturhald kirkjunnar. Kaþólsk kirkja á Spáni var aldrei fasísk, eins og Jón vill þó meina, en eftir að anarkistar og kommúnistar lýðveldisins höfðu farið með eyðingareldi um kirkjur og drepið fjölda presta og munklífisfólks, þá var eðlilegt, bara í þeim aðstæðum, að mörgum kirkjunnar mönnum þætti barátta Francos gegn því lýðveldi gefa þeim von um skaplegra ástand. En kaþólska kirkjan vill standa vörð um mannréttindi og það mun betur en stjórn Zapateros hefur sýnt sig að kunna eða vilja.
Ég þakka þér aftur greinarskrifið, og gaman væri að sjá frá þér – spænskulesandi, fjölfróðum manninum – fréttir af þeim kosningum, sem senn kunna að gerbreyta stöðu mála á Spáni.
Pax tecum, frater dilectissime.
Þakka þér góð orð nafni. Frá því í júlí 1936 til og með apríl 1937 voru hvorki meira né minna en 68, 321 prestar og meðlimir í trúarreglunum –karlar jafnt sem konur – myrt á Spáni á þeim svæðum sem rauðliðar höfðu lagt undir sig. Meðal þeirra voru 13. biskupar. Til samanburðar voru einungis tveir biskupar myrtir í frönsku stjórnarbyltingunni. Fyrstu konurnar voru þrjár óskóaðar karmelsystur: systir Maria del Pilar, systir Teresa del Niño Jesus og systir Maria Angeles de San José. Þær höfðu unnið sér það til óhelgis að hafa varið lífi sínu í fyrirbænir fyrir samborgurum sínum.
Morðin á þessum þjónum kirkjunnar voru í anda rauðliðanna í Rússlandi. Við skulum taka dæmi af Sarovklaustrinu í Rússlandi sem heil. Serafim frá Sarov hafði stofnað. Þeir bræðranna og systranna sem ekki voru myrt voru pyntuð og misþyrmt og klausturskóginum breytt í gúlagbúðir. Brátt urðu íbúarnir í Sarov varir við að torkenninlegar járnrautir tóku að leggja komur sínar á brautarstöðina á nóttinni fullar af óvinum byltingarinnar sem bárum beinin í Sarovskóginum.
Ég hef kosið að nefna þetta stjórnarfar sósíalfasisma. Í Sovétríkjunum og á Spáni var hann framkvæmdur undir gunnfána rauðliða og stjórnleysingja (anarkista) en í Þriðja ríki sósíalfasima Hitlers undir fána hakakrossins. Kristin kirkja á lýsandi dæmi um píslarvotta sem fórnuðu lífi sínu í baráttunni við þessi myrkvaöfl. Aðeins skal minnst á heimspekinginn og karlmelsysturina Edit Stein sem lét lífið í Auswitch og Diterich Boenhoffer, lúterskan guðfræðing, sem var tekinn af lífi í apríl 1945: Hann neitaði að taka í framrétta hendi sósíalfasistanna og varð að gjalda með lífi sínu.
Hryggilegt er til þess að hugsa að í dag eru það hvorki pólitískir andstæðingar eða Gyðingar sem eru fórnardýr dauðamenningar sósíalfasismans heldur ómálga og varnarlaus börn í móðurkviði. Við skulum hlýða á orð heil. Gregoríosar frá Nazíanzen (330-390) sem komst í kynni við dauðamenninguna við heiðið rómverskt keisaravald:
„Lasarus, kom út!“ Þar sem þið láguð í gröfinni heyrðuð þið hina hvellu raust. Er nokkur raust jafn hvell og raust Orðsins? Þá genguð þið út, þið sem ekki voruð einungis lífvana í fjóra daga heldur í reynd langtímum saman. Þið risuð upp með Kristi . . . og grafarböndin féllu til jarðar. Verðið dauðanum ekki að nýju að bráð. Snúið ekki að nýju til þeirra sem dvelja í gröfunum. Látið ekki hefta ykkur að nýju með grafarböndum synda ykkar. Væruð þið þess umkomin að snúa að nýju til lífsins? Gætuð þið komið upprisu allra manna til leiðar við enda tímanna? . . .
Látið því raust Drottins hljóma í eyrum ykkar! Ljúkið þeim ekki aftur í dag andspænis uppfræðslu og áminningum Drottins. Ef þið voruð blind og án ljóss í gröf ykkar, ljúkið þá upp augum ykkar svo að þið sofnið ekki svefni dauðans. Sjáið ljósið í ljósi Drottins. Horfið til Sonarins í Anda Guðs. Ef þið meðtakið Orðið í öllum mætti þess þá beinið þið krafti Krists til ykkar sjálfra sem græðir og lífgar . . . Óttist ekki að leggja eitthvað á ykkur til að varðveita hreinleika skírnarinnar og leggið brautina hið innra í hjörtum ykkar sem liggur til Drottins. Gætið þess að standa vörð um endurgjaldið sem þið þáðuð í hreinni náð . . .
Við skulum vera ljós eins og lærisveinarnir lærðu hjá honum sem er hið mikla Ljós: „Þið eruð ljós heimsins“ (Mt 5. 14). Við skulum vera lýsandi lampar í þessum heimi með því að hefja Orð lífsins hátt til lofts og verða að lífskrafti fyrir aðra. Við skulum hefja leitina að Guði og leita hans sem er hið fyrsta og hreinasta allra ljósa.“
Bræður og systur! Biðjum fyrir þeim hrelldu sálum á okkar tímum sem unna ómálga börnum ekki lífs vegna afvegaleiddrar hugmyndafræði dauðamenningarinnar sem ættuð er frá óvini alls lífs: Satan.
Þakka þér fyrir þetta, Jón Rafn. Menn tali eftir því, að fjöldi prestanna og reglufólksins (munka og nunna), þeirra sem drepnir voru af kommúnistum og anarkistum á Spáni, var ekki 68 og ekki 321, heldur 68.321 !! Þvílík var heift og ofstæki þessara róttæklinga, sem herir Francos börðu síðan á bak aftur.
Ég vísaði á þessa grein þína í stuttum pistli mínum á Moggablogginu:
Jón Baldvin kominn út af sporinu í róttækri kerlingapólitík.
Að töldum 99,8% atkvæðum hafa sósíalistar tryggt sér 43,72% atkvæða og 169 þingsæti (fimm fleiri en i síðustu kosningum).
Íhaldsmenn 40, 13% og fimm fleiri þingsæti en 2004 eða 154. Þannig hafa stóru flokkarnir hlotið 323 af 350 þingsætum sem aldrei hefur gerst áður í sögu lýðveldisins.
Vonir Zapateros um hreinan meirihluta hafa því brugðist. Til að tryggja framgang mála sinna á þingi þarfnast hann stuðnings að minnsta kosti sjö þingmanna úr öðrum flokkum til að ná málum sínum fram á þingi. (Samkvæmt El Pais kl. 02:00 í nótt): „En la próxima legislatura, los socialistas necesitarán en cada votación el apoyo de al menos siete diputados de otros grupos para sacar sus leyes y proyectos adelante.“
Samkvæmt skoðanakönnun TVE (Television Española) frá því á mánudag (síðasta deginum sem heimilt var að birta skoðanakannanir fyrir kosningar) var sósíalistum spáð 172-178 þingsætum og hægri mönnum 152-158.
Á skjánum hjá spænsku sjónvarpsstöðinni TVE í gær birtist brosandi og bráðfalleg stúlka ættuð frá Indónesíu og sagði: „Við kjósum sósíalistanna, þeir eru miklu betri en íhaldsmennirnir.“ Það er þessi staðreynd sem Jón Valur víkur að á „Moggabloggi“ sínu í dag: jonvalurjensson.blog.is Grein hans heitir: „Innflytjendur á Spáni réðu líklega úrslitum um sigur sósíalista í kosningunum í gæt; áhyggjuefni fyrir fleiri en Spánverja.“
Við nafnarnir höfum skrifað fjölmargar greinar hér á kirkju.net um röskun fólksfjöldapíramídans og af þeim geigvænlegu afleiðingum sem hún mun hafa fyrir Vesturlönd og rekja má til hömlulausra fósturdeyðinga. Einungis í örþjóðfélagi eins og Íslandi hafa um 25.000 börn þannig orðið að fórnarlömbum sláttumanns dauðans síðan 1975. Á alheimsvísu er hér um milljarð barna að ræða á s. l. tveimur áratugum.
Joseph D’Agostino hefur kallað þessa stefnu: Sjálfsmorð Vesturlanda sjá: http://www.kirkju.net/index.php/jonrafn/2007/03/17/p1150
Jón Valur hittir naglann á höfuðið í grein sinni. Við sjáum þessi sjúkdómseinkenni birtast með áþreifanlegum hætti í úrslitum spænsku þingkosninganna þar sem innflytjendur réðu úrslitum.
Á næstu hundrað árum verður Evrópuþjóðum spúð út úr löndum sínum, það er að segja öðrum falið landið til eignar. Þetta vakti mikla gleði hjá Moammar Gadhafi Líbýuforseti í ræðu á Al Jazeera sjónvarpsstöðinni þann 3. maí 2006 þegar hann sagði sigri hrósandi:
„Íslam mun leggja Evrópu að fótum sér. Við höfum þú þegar 50 milljónir múslima í Evrópu. Allt bendir til þess að Allah láti íslam sigra Evrópu, ekki með sverði og án skotvopna. Innan örfárra áratuga mun Evrópa verða að múslimsku yfirráðasvæði.“
Því miður hefur hann á réttu að standa. Sökum hömlulausra fósturdeyðinga mun Evrópubúum fækka úr tæplega 800 milljónum í um 260 milljónir á næstu hundrað árum og fáni spámannsins blakta yfir höfuðstöðvum ESB í Brüssel. Þeim konum sem aðhyllast rótttækan femínisma frú Margaret Sangers á Íslandi skulu þó færð þau huggunarorð að Elín Pálmadóttir blaðamaður segir að íslamskar konur séu alls ekki svo óánægðar að ganga með blæjur!
Það er hryggilegt til þess að hugsa hvernig lýðræðisjafnaðarmenn hafa gleypt boðskap dauðamenningar sósíalfasismans hráa og ómengaða og gert að sinni. Vafalaust er þetta mesti sigur kommúnismans fram til þessa: ENDURREISN HINNA HUGLÆGU SOVÉTRÍKJA!!! (ESB).
