« Hinir þrír miklu risar hjartansBjargið alda – borgin mín »

04.09.06

  08:56:25, Skrásetjari: Jón Rafn Jóhannsson, 519 orð  
Flokkur: Ritningarlestur dagsins

Ritningarlesturinn 4. september 2006

Heilagt guðspjall Jesú Krists í dag er úr Lúkas 4. 16-30.

Hann kom til Nasaret, þar sem hann var alinn upp, og fór að vanda sínum á hvíldardegi í samkunduna og stóð upp til að lesa. Var honum fengin bók Jesaja spámanns. Hann lauk upp bókinni og fann staðinn, þar sem ritað er: Andi Drottins er yfir mér, af því að hann hefur smurt mig. Hann hefur sent mig til að flytja fátækum gleðilegan boðskap, boða bandingjum lausn og blindum sýn, láta þjáða lausa og kunngjöra náðarár Drottins. Síðan lukti hann aftur bókinni, fékk hana þjóninum og settist niður, en augu allra í samkundunni hvíldu á honum. Hann tók þá að tala til þeirra: „Í dag hefur rætst þessi ritning í áheyrn yðar.“ Og allir lofuðu hann og undruðust þau hugnæmu orð, sem fram gengu af munni hans, og sögðu: „Er hann ekki sonur Jósefs?“ En hann sagði við þá: „Eflaust munuð þér minna mig á orðtakið: ,Læknir, lækna sjálfan þig!' Vér höfum heyrt um allt, sem gjörst hefur í Kapernaum. Gjör nú hið sama hér í ættborg þinni.“ Enn sagði hann: „Sannlega segi ég yður, engum spámanni er vel tekið í landi sínu. En satt segi ég yður, að margar voru ekkjur í Ísrael á dögum Elía, þegar himinninn var luktur í þrjú ár og sex mánuði, og mikið hungur í öllu landinu, og þó var Elía til engrar þeirra sendur, heldur aðeins til ekkju í Sarepta í Sídonlandi. Og margir voru líkþráir í Ísrael á dögum Elísa spámanns, og enginn þeirra var hreinsaður, heldur aðeins Naaman Sýrlendingur.“ Allir í samkunduhúsinu fylltust reiði, er þeir heyrðu þetta, spruttu upp, hröktu hann út úr borginni og fóru með hann fram á brún fjalls þess, sem borg þeirra var reist á, til þess að hrinda honum þar ofan. En hann gekk gegnum miðja mannþröngina og fór leiðar sinnar.

Í dag heiðrar kirkjan: Heil. Rósu frá Viterbo (1233-1251). Hugleiðing dagsins: Úr helgisiðum kirkjunnar. Fermingarsakramentið, Yfirlagning handanna: „Andi Drottins er yfir mér, af því að hann hefur smurt mig.“

Almáttugur Guð,
Faðir Drottins okkar Jesú Krists.
Lít þú til þessara skírnarbarna sem vér leggjum hendur vorar yfir:
Í skírninni frelsaðir þú þau frá syndinni,
og með vatninu og Heilögum Anda veittir þú þeim nýtt líf (Jh 3, 4).
Send þú nú Heilagan Anda yfir þau,
eins og þú gafst fyrirheit um.
Gef þeim alla fyllingu þess Anda
sem hvíldi yfir Syni þínum Jesú:
Anda speki og skilnings,
Anda ráðgjafar og styrks,
Anda þekkingar og ótta Drottins (Jes 11, 2).
Fylltu þau anda furðu og ótta í nærveru þinni.
Um þetta biðjum vér fyrir Drottin Krist, Frelsara okkar,
hann sem lifir að eilífu.

© Bræðralag kristinna trúarkenninga

SJÁ VEFRIT KARMELS:
http://tabernacleoftheheart.com/Vefrit_Karmels/Greinar%20og%20skrif/Ritningarlestrar/Inngangur/Inngangur.html

No feedback yet