« Nýtt vefsetur: www.fokolare.isFréttatilkynning frá Kaþólsku kirkjunni »

14.10.11

  23:18:00, Skrásetjari: Ragnar Geir Brynjólfsson   , 163 orð  
Flokkur: Kaþólska kirkjan á Íslandi

Kaþólska kirkjublaðið 20 ára

Um þessar mundir eru 20 ár liðin síðan Kaþólska kirkjublaðið kom út í fyrsta sinn, í júní 1991. Á þeim tíma hafa komið út 196 tölublöð. Með tilkomu Kirkjublaðsins var útgáfu Sóknarblaðs Kristskirkju hætt en Sóknarblaðið hafði verið gefið út frá október 1980. Af sumarhefti blaðsins á þessu ári 2011 voru prentuð 4200 eintök. Kostnaður við eitt tölublað er um 570 þús. krónur. Þetta kemur fram í pistli sem séra Denis O'Leary skrifar í septemberhefti blaðsins.

„Megi Kirkjublaðið halda áfram að koma út á ókomnum árum og skýra frá lífi kirkjunnar innanlands sem utan“, skrifar séra Denis og bætir við: „Megi það einnig halda áfram að styrkja eininguna og sambandið milli safnaðanna og hópanna í biskupsdæmi okkar og annars staðar ... Til hamingju með afmælið.“[1]

Kaþólska kirkjublaðið er sent heim til meðlima kaþólsku kirkjunnar og þeirra sem þess óska. Áskriftarsími blaðsins er 552 5388 og netfang catholica@catholica.is. Kirkjublaðið er fjármagnað með frjálsum framlögum. Þeir sem vilja styrkja útgáfu blaðsins geta lagt inn á reikning 513-26-3143, kt. 681069-4629. [2].

[1] Kaþólska kirkjublaðið, bls. 14, 9. tbl. 2011.
[2] Kaþólska kirkjublaðið, bls. 22, 8.-9. tbl. 2009.

2 athugasemdir

Athugasemd from: Jon Valur Jensson

Þetta er að mínu mati allt of hár kostnaður við hvert tölublað Kaþólska kirkjublaðsins. Ég býðst til að undirbjóða í prófarkalestur blaðsins; hver sem þókknun fyrir hann kann að vera, býðst ég til að til að vinna verkið fyrir 60% núverandi þókknunar.

27.11.11 @ 20:36
Athugasemd from: Ragnar Geir Brynjólfsson

Takk fyrir innlitið og athugasemdina Jón.

Já, ég tek undir þetta með þér Jón. Kostnaðurinn við útgáfuna hefur hækkað enda hefur allur kostnaður svo sem sendingarkostnaður hækkað mikið á síðustu árum.

Sendingarkostnaðurinn og hátt hlutfall tölvuvæddra heimila hefur t.d. almennt þau áhrif að æ fleiri kjósa rafræn skjöl og það sem skilar sér inn um lúguna er mest fjölpóstur.

Það er spurning hvort hægt væri að spara þarna með því að færa útgáfu Kirkjublaðsins á netið og minnka blaðið í ein- eða tvíblöðung sem yrði sendur út tvisvar- þrisvar á ári. Nægilega oft til að minna á kirkjuna.

Svona blöðungur þyrfti ekki að innihalda mikið meira en upplýsingar um messur, símanúmer, net- og heimilisföng prestanna, hugsanlega örfréttir/tilkynningar og svo tilvísanir á vefi kirkjunnar þar sem hægt væri að nálgast ítarlegri upplýsingar.

03.12.11 @ 20:04