« Ritningarlesturinn 3. nóvember 2006Ritningarlesturinn 2. nóvember 2006 »

02.11.06

  10:04:31, Skrásetjari: Jón Rafn Jóhannsson, 2274 orð  
Flokkur: Hinir þrír myrku dagar

Hinir þrír myrku dagar (3)

3. Opinberun heil. Padre Píós frá árinu 1949.

Þetta er þýðing á einkabréfi sem Padre Pió skrifaði til Herolsbachnefndarinnar sem Vatíkanið skipaði og staðfestir sannleiksgildi og raunveruleika þessarar opinberunar sem Drottinn opinberaði kapúsínaföðurnum frá Pietrelcina sem bar sáramerki (stigmata) Krists. [1]

Nýárskvöld 1949
Jesús: „Sonur minn, sonur minn! Ég hef þráð þessa stund þar sem ég mun að nýju opinbera þér mikla elsku Hjarta míns. Ég elska mennina afar heitt, einkum þá sem gefast mér. Þeir eru mér skjól og huggun í þeirri miklu vansæmd sem mér er sýnd í Sakramenti elsku minnar.

Biddu og gerðu yfirbót vegna mín. Hvettu aðra til að gera hið sama vegna þess að sá tími er nærri þegar ég mun heimsækja ótrúfastan lýð minn vegna þess að hann hefur ekki virt tíma náðar minnar. Verið staðfastir í bæninni svo að mótstöðumaður ykkar öðlist ekki vald yfir ykkur. Segðu lýð mínum að vera viðbúinn öllum stundum vegna þess að dómur minn mun falla skyndilega og þegar síst er að vænta og enginn mun sleppa undan hendi minni. Ég mun finna alla! Ég mun vernda hina réttlátu. Gefið sólinni, tunglinu og stjörnum himins gætur. Þegar gangur þeirra virðist raskast og verða stjórnlaus vitið þið að dagurinn er ekki fjarri. Verið sameinuð í bæninni og vakið þar til engill eyðingarinnar hefur gengið hjá dyrum ykkar. Biðjið um að dagar þessir verði styttir.

Mínir elskuðu, treystið mér. Ég er mitt á meðal ykkar. Konungsríki mitt verður vegsamlegt gjört og nafn mitt verða blessað frá uppgöngu sólar uns hún gengur til viðar og Konungsríki mitt mun vara að eilífu.“

23. janúar 1950
„Biddu! Gerðu yfirbót! Vertu ákafur og legðu rækt við ögunarlífið. Mikið er undir þessu komið. Menn hlaupa fullir gleði og fögnuði niður í hyldýpi helvítis líkt og þeir séu að fara á grímudansleik [2] eða í brúðkaup sjálfs djöfulsins! Hjálpið mér að frelsa sálirnar. Mælir syndarinnar er fullur! Dagur hefndarinnar með harmkvælum sínum er nærri! Nærri en þið getið ímyndað ykkur! Og heimurinn sefur í fölsku öryggi! Dómur Guðs mun ríða yfir eins og eldingarleiftur! Þessu guðlausa fólki sem er fullt illsku verður tortímt án miskunnar eins og átti við um íbúa Sódómu og Gómorru til forna. Já, ég segi ykkur að illskan var ekki eins mikil þá og hjá mannkyninu í dag!“

28. janúar 1950
Hyljið glugga ykkar vel. Horfið ekki út. Kveikið á blessuðu kerti sem endast mun dögum saman. Biðjið rósakransinn. Lesið andlegar bækur. Gerið andlega bergingu [3] og tjáið ástúð ykkar eins og OKKUR er svo velþóknanleg. Biðjið með útréttum örmum eða leggist flöt á gólfið þannig að margar sálir verði frelsaðar. Farið ekki út úr húsum ykkar. Byrgið ykkur upp af nægilegum mat. Kraftar náttúrunnar munu bifast og eldregn mun fá fólk til að skjálfa á beinunum af ótta. Verið hugrökk! Ég er mitt á meðal ykkar.

7. febrúar 1950
Gefið gaum að dýrunum meðan á þessum dögum stendur. Ég er Skaparinn og verndari allra skepna sem manna. Ég mun gefa ykkur nokkur tákn áður en til þessa kemur og þá getið þið fóðrað þau betur. Ég mun varðveita eignir hinna útvöldu og þar á meðal skepnurnar vegna þess að þær þarfnast einnig viðurværis að þessu loknu. Látið engan ganga út í garðinn, jafnvel ekki til að fóðra skepnurnar. Sá sem gengur út undir bert loft mun farast! Hyljið glugga ykkar afar vel. Mínir útvöldu eiga ekki að sjá reiði mína. Treystið mér og ég mun veita ykkur vernd. Trúfesta ykkar knýr mig til að koma til ykkar.

Tími komu minnar stendur fyrir dyrum! En ég mun vera miskunnsamur. Skelfileg refsing mun bera tímunum vitni. Englar mínir sem munu annast þetta verk eru reiðubúnir með hvassbrýnd sverð! Þeir munu gæta þess sérstaklega að tortíma öllum sem hafa smánað mig og vildu ekki trúa opinberun minni.

Eldlegir fellibylir munu brjótast fram úr skýjunum og breiðast út um alla jörðina! Stormar, stórviðri. þrumur og jarðskjálftar munu ríða yfir jörðina í tvo daga. Óstöðvandi eldregn mun eiga sér stað! Þetta mun hefjast á nístingskaldri nóttu. Allt ber þetta því vitni að Guð er Herra sköpunarinnar. Þeir sem vona á mig og trúa orði mínu þurfa ekkert að óttast vegna þess að ég mun ekki snúa baki við þeim fremur en þeim sem útbreiddu fagnaðarerindi mitt. Þeir sem lifa á stigi náðarinnar og leita verndar Móður minnar munu heldur ekki verða fyrir tjóni.

Svo að þið verðið reiðubúin fyrir þessa heimsókn mun ég gefa ykkur eftirfarandi tákn og leiðbeiningar. Nóttin verður nístingsköld. Stormviðri mun geisa. Að skömmum tíma liðnum munu þrumur taka að duna. Lokið öllum dyrum og gluggum. Leyfið engum að fara út undir bert loft. Krjúpið niður fyrir framan róðukross og iðrist synda ykkar og biðjið Móður mína um vernd hennar. Meðan jarðskjálftarnir ganga yfir skuluð þið ekki fylgjast með vegna þess að reiði Guðs er heilög!“ Jesús vill ekki að við sjáum reiði Guðs vegna þess að íhuga verður reiði Guðs af guðsótta og skelfingu.

„Þeir sem sinna ekki þessari viðvörum verða umsvifalaust deyddir. Vindurinn mun bera með sér eiturgas sem dreifast mun um alla jörðina. Þeir sem þjást sökum þessa deyja samstundis og verða píslarvottar og verða með mér í Konungsríki mínu.

Satan mun sigra! En á þremur nóttum munu jarðskjálftarnir og eldarnir líða undir lok. Daginn eftir mun sólin taka að skína aftur og englar koma af himni ofan og boða frið á jörðinni. Ósegjanleg sæla mun gagntaka þá sem lifa þessa eldraun af, þá mestu refsingu sem Guð hefur látið ganga yfir jörðina síðan hún var sköpuð.

Ég hef útvalið sálir í öðrum löndum eins og Belgíu, Sviss og á Spáni sem einnig hafa meðtekið þessa opinberun, þannig að önnur lönd verði einnig reiðubúin. Biðjið mikið á þessu heilaga ári 1950.

Biðjið rósakransinn, en biðjið hann vel svo að bænir ykkar nái til himna. Brátt munu enn meiri hamfarir koma yfir þá gagnstætt því sem allir vænta. Hversu ólíkt undirbúa þeir sig ekki fyrir þessa óheyrðu atburði sem þeir verða brátt að ganga í gegnum!

Vog réttlætisins hefur náð til jarðarinnar! Reiði Föður míns mun verða úthellt yfir alla jörðina! Ég er aftur að vara heiminn við fyrir þinn munn sem verkfæri mitt eins og ég hef gert svo oft áður.
Syndir mannanna hafa margfaldast takmarkalaust. Virðingarleysi í kirkjum, syndsamlegt stærilæti sem framið er í andatrú, skortur á bróðurlegri elsku, siðlaus klæðaburður, einkum á sumardvalastöðum. Heimurinn er fullur guðsafneitunar.

Þessar hamfarir munu koma yfir jörðina eins og eldingarleiftur og á þessu andartaki mun birta morgunsólarinnar umhverfast í svartnætti! Enginn ætti að fara út úr húsi eða horfa út um glugga frá og með þessari stundu. Sjálfur mun ég koma í eldingarleiftrinu. Þeir sem eru fullir illsku munu ekki sjá guðlegt Hjarta mitt. Ringulreiðin mun verða mikil sökum þessa myrkurs sem hvíla mun yfir allri jörðinni og margir munu deyja úr ótta og örvæntingu.

Þeir sem kveikja ljós sökum mín munu öðlast náð guðlegs Hjarta míns. Og ákallið „HVER ER SEM GUГ mun verða eins og verndarskjöldur fyrir marga. En þrátt fyrir þetta munu margir fuðra upp eins og skrælnað gras á akri! Hinum guðlausu verður tortímt þannig að hinir réttlátu geti byrjað að nýju að þessu loknu.

Á þessum degi jafnskjótt og svartnættið er skollið á ætti enginn að fara út úr húsi sínu eða að horfa út um glugga. Svartnættið mun vara í sólarhring og enn annan sólahring og þriðja sólarhringinn. En þá nótt sem kemur í kjölfarið munu stjörnurnar skína að nýju og um morguninn mun sólin rísa aftur og VORIÐ MUN KOMA!!

Á þessum myrku dögum eiga mínir útvöldu ekki að sofa eins og lærisveinarnir í garðinum á Olíufjallinu. Þeir eiga að biðja í sífellu og ég mun ekki bregðast þeim. Ég mun safna mínum útvöldu saman. Helvíti trúir að það hafi náð valdi yfir allri jörðinni, en ég mun endurheimta hana. [4]

Haldið þið ef til vill að ég myndi heimila Föður mínum að láta slíka skelfilega refsingu koma yfir heiminn, ef heimurinn snérist frá illsku til réttlætis? En sökum mikillar elsku minnar munu þessum þrengingum verða heimilað að koma yfir mennina. Þrátt fyrir að menn bölvi mér munu þúsundir sálna frelsast sökum þrenginganna. Enginn mennskur skilningur getur borið skyn á dýpt elsku minnar!

Biðjið! Biðjið! Ég þrái bænir ykkar. Ástfólgin Móðir mín María, heilagur Jósef, heilög Elísabet, heilagur Konrad, heilagur Mikjáll, heilagur Pétur, Theresa litla og heilagir englar ykkar verða fyrirbiðjendur ykkar. Ákallið þá um hjálp! Verið hugrakkir, hermenn Krists! Þegar ljósið skín að nýju skuluð þið þakka Heilagri Þrenningu fyrir vernd þeirra! Eyðileggingin verður geigvænleg! En ég, Guð ykkar, mun hreinsa jörðina. Ég er með ykkur. Treystið mér!

(Hér endar boðskapur Padre Píó).

Greint er frá þessum boðum eins og þau bárust. Á þessari stundu hefur kirkjan ekki tjáð sig um þau opinberlega. En í ljósi ástandsins í heiminum í heild er viturlegt að hafa þetta í huga, þannig að við séum reiðubúin þegar þetta nær fram að ganga. Heilög kirkja hefur ætíð áminnt börn sín um að vera ávallt reiðubúin og lifa á stigi náðarinnar svo að við séum verðug hins eilífa lífs þegar að dauðastundinni kemur. Góður kaþólskur einstaklingur er ætíð reiðubúinn eða ætti að vera það vegna þess að við vitum ekki hvenær stundin rennur upp.
Það fólk er að finna sem telur að þar sem svo mörg ár eru liðin síðan þessi opinberun átti sér stað og enn hafa hinir þrír myrku dagar ekki skollið á, að þá muni slíkt ekki ná fram að ganga. En þetta er fjarri öllum sanni. Það er Guð einn sem veit tímann og refsingunni hefur augljóslega verið slegið á frest sökum stöðugra bæna og fórna góðs fólks. En jarðarbúar verða og munu verða hreinsaðir af núverandi illsku sinni og við verðum að undirbúa okkur fyrir þessa skelfilegu þrjá myrku daga á sérhverri stundu. Opinberun bróðir Davíðs frá árinu 1992 er áminning um þetta og um hana mun ég fjalla næst.

[1]. Rit um heil. Padre Píó er fyrirliggjandi á Vefrit Karmels: Padre Píó, presturinn heilagi, eftir Jim Gallaher.
[2]. Hafið í huga göngur hinna siðvilltu sem milljónir manna fagna um allan heim. Hvernig munu þessar sálir bregðast við eftir dauðann þegar legíón lostans krefur þær um tollinn af lífstalentu þeirra?
[3]. Ljóst er að hinir trúuðu munu ekki komast til kirkju. Í tilmælum frá 24. nóvember 1924 kemst
Stjórnardeild trúarkenninga svo að orði um hina andlegu bergingu: „Ó, Jesús. Ég sný mér til hins heilaga guðslíkamahúss þar sem þú lifir hulinn sökum elsku til mín. Ég elska þig Guð. Ég get ekki meðtekið þig í heilagri útdeilingu. Kom þú engu að síður og vitja mín í náð þinni.
Kom þú með andlegum hætti í hjarta mitt. Helga þú það. Ger það eins og þitt eigið Hjarta. Amen.“
[4]. Fyrir rúmlega tíu árum gerði ég sem skrifa þetta sjálfur eftirfarandi tilraun: Um hávetur þegar
vetrarkuldinn var hvað mestur tók ég rafmagnið af íbúð minni í þrjá sólahringa og skrúfaði fyrir
hitaveituna og byrgði alla glugga. Kuldinn varð brátt mikill í íbúðinni þannig að ég varð að mestu að kúra undir sæng og verja tímanum í bæn og andlegan lestur (lectio divina) við kertaljós. En vafalaust mun fjölskyldufólk geta haldið á sér betri hita með því að kúra undir einni og sömu sænginni. Guð mun gefa fólki styrk og náð til að vaka í bæninni.

Næst: 4. Opinberun bróður Davíðs í Medjugorje

No feedback yet


Form is loading...