Blaðsíður: 1 ... 5 6 7 ...8 ... 10 ...12 ...13 14 15 ... 46

16.04.09

Páfagarður hafnar sendiherrum sem taka afstöðu gegn lífinu

Páfagarður hefur hafnað þremur sendiherraefnum, sem stjórn Baracks Obama hefur lagt til. Var sagt frá þessu í lok hádegisfrétta Ríkisútvarpsins í dag. Meðal þessara þriggja hafi verið Caroline Kennedy, dóttir hins kaþólska Johns F. Kennedy, fyrrum Bandaríkjaforseta. Páfagarður mun hafa hafnað þessum þremur sem sendiherraefnum "vegna afstöðu þeirra til fóstureyðinga," eins og segir í fréttinni.

Við könnun á málinu má rekja það til frétta frá Írlandi og Ítalíu.

Öll færslan - smellið hér til að lesa alla færsluna »

12.04.09

  08:12:30, Skrásetjari: Jón Rafn Jóhannsson, 323 orð  
Flokkur: Hugleiðingar

Hl. Maxímus frá Tórínó: Þetta er dagur fögnuðar og gleði

Þetta er dagurinn sem Drottinn hefir gjört, fögnum, verum glaðir á honum“ (Sl 118. 24). Það er engin tilviljun, bræður, að í dag lesum við þann sálm þar sem spámaðurinn býður okkur að fagna og gleðjast og að heilagur Davíð bjóði allri sköpuninni að halda þennan dag hátíðlegan. Í dag hefur upprisa Krists lokið upp hvíldarstað hinna framliðnu. Hinir nýlega skírðu í kirkjunni hafa yngt þennan dag upp og Heilagur Andi hefur leitt okkur hið himneska fyrir sjónir. Helja stendur opin og lætur af hendi hina dauðu. Himininn stendur galopinn og fagnar þeim sem rísa upp til hans.

Ræninginn er farinn til Paradísar (Lk 23. 43) og líkamar hinna heilögu ganga inn í borgina helgu (Mt 27. 53) . . . Við upprisu Krists hefur verið hrært við öllum frumefnunum og allt er hafið í hæðir. Víti afhendir englunum alla þá sem hafðir voru í haldi og himininn leiðir alla þá sem meðtakið hafa fyrir Drottinn . . . Upprisa Krists veitir hinum dauðu líf, syndurum fyrirgefningu og hinum heilögu dýrðina. Þannig kveður hinn mikli Davíð allt sköpunarverkið til að fagna upprisu Krists og hvetur það til að dansa af fögnuði og gleði á þessum degi sem Drottinn hefur gjört.

Þið munuð spyrja: En himninum og Helju hefur ekki verið skipaður staður innan marka dagsljóss þessa heims og getum við því vænst þess að þetta tvennt fagni degi sem opinberar það ekki? En dagur Drottins umvefur alla hluti, felur í sér alla hluti og umlykur samtímis himin, jörð og víti! Engir skilveggir hindra ljós Krists fremur en að frumefnin myrkvi það eða varpi á það skugga. Ljós Krists er sannarlega dagur án nætur, endalaus dagur. Það brýst fram alls staðar, ljómar alls staðar og dvelur alls staðar.

11.04.09

  09:34:46, Skrásetjari: Jón Rafn Jóhannsson, 385 orð  
Flokkur: Hugleiðingar

Blessaður Guerric frá Igny (1080-1157), páskavakan

„Þetta er dagurinn sem Drottinn hefur gjört“

Bræður: „Þetta er dagurinn sem Drottinn hefir gjört, fögnum, verum glaðir á honum“ (Sl 118. 24). Við skulum fagna í þeirri von sem hann felur í sér svo að við getum séð og glaðst í ljósi hans. Abraham vænti þess með fögnuði að sjá dag Krists, og hann sá og gladdist (spr. Jh 8. 58). Ef þið vakið sjálfir af árvekni við dyrastaf viskunnar (Ok 8. 34) . . . ef þið vakið ásamt Maríu Magdalenu við dyrnar að gröfinni, þá munuð þið ef mér skjátlast ekki sannreyna með Maríu hversu sönn orðin um spekina eru sem er Kristur: „Þeir sem elska hana eiga auðvelt með að sjá hana og þeir sem leita hennar finna hana“ (SS 6. 12).

Þetta gaf Kristur, sjálf spekin, fyrirheit um: „Ég elska þá sem mig elska, og þeir sem vaka frá því árla morguns, finna mig“ (Ok 8. 17). María fann Jesús í holdi og af þessum ástæðum hélt hún vöku sinni. Hún hafði komið til að vaka yfir gröfinni meðan enn var ekki bjart af degi. Þið sem eigið ekki lengur að þekkja Jesús með holdlegum hætti (2Kor 5. 16) heldur í anda munuð finna hann með andlegum hætti, ef þið leitið af sömu þrá og María: „Af hjarta þrái ég þig á næturnar, já, með andanum í brjósti mínu skima ég eftir þér“ (Jes 26. 9). Segið með orðum og hugarfari sálmaskáldsins: „Bíð róleg eftir Guði, sála mín, frá honum kemur hjálpræði mitt“ (Sl 62. 2) . . .

Haldið því vöku ykkar, bræður, stöðugir í bæninni . . . einkum sökum þess að morgunn þess dags sem ekki á sér sólarlag hefur þegar risið yfir ykkur . . . Sannarlega er nú sú stund að okkur ber að rísa af svefni. Nóttin er afstaðin og dagurinn í nánd (Rm 13. 11-12). Vakið því segi ég svo að árdegisroðinn blasi við ykkur sem er Kristur, sem mun renna upp eins og morgunroðinn (Hs 6. 3) og er reiðubúinn til að endurnýja iðulega morgun upprisu sinnar í þeim sem vaka. Þá munuð þið syngja af fagnandi hjörtum: „Þetta er dagurinn sem Drottinn hefur gjört, fögnum, verum glaðir á honum.“

09.04.09

  09:15:42, Skrásetjari: Jón Rafn Jóhannsson, 386 orð  
Flokkur: Hugleiðingar

Benedikt páfi XVI: Úr Sacramentum caritatis

„Enginn á meiri kærleik en þann að leggja líf sitt í sölurnar fyrir vini sína“ (Jh 15. 13)

Sakramenti kærleikans, hin heilaga Evkaristía, er sú gjöf þar sem Jesús Kristur gefst sjálfur og opinberar þannig fyrir okkur takmarkalausa elsku Guðs á sérhverjum karli og konu. Þetta undursamlega sakramenti birti okkur þann „meiri kærleika“ sem fékk hann til „að leggja líf sitt í sölurnar fyrir vini sína“ (Jh 13. 1). Með þessum orðum víkur guðspjallamaðurinn að takmarkalausri auðmýkt Krists: Áður en hann dó á krossinum batt hann um sig mittislinda og laugaði fætur lærisveina sinna. Með sama hætti heldur Jesús áfram að gera þetta í sakramenti Evkaristíunnar, að elska okkar „allt til enda,“ jafnvel að fórna líkama sínum og blóði fyrir okkur. Hversu undrandi hljóta postularnir ekki að hafa verið þegar þeir urðu vitni að því sem Drottinn gerði og sagði við kvöldmáltíðina! Hversu mikla undrun hlýtur leyndardómur Evkaristíunnar ekki að glæða í okkar eigin hjörtum! . . .

Í þessu sakramenti verður Drottinn sannarlega að fæðu fyrir okkur til að svala þorsta okkar eftir sannleika og frelsi. Þar sem það er einungis sannleikurinn sem gerir okkur frjáls (spr. Jh 8. 32) verður Kristur að sannleiksfæðu. Drottinn Jesús Kristur, „vegurinn, sannleikurinn og lífið“ (Jh 14. 6) talar til þyrstra pílagrímshjartna okkar, hjartna sem þrá uppsprettu lífsins, hjartna okkar sem þrá sannleikann. Jesús Kristur er sannleikurinn með persónulegum hætti sem dregur heiminn til sín . . .

Í sakramenti Evkaristíunnar sýnir Jesús okkur með sérstökum hætti sannleikann um elskuna sem er sjálft eðli Guðs. Það er þessi sannleikur fagnaðarerindisins sem er áskorun til okkar allra og allrar verundar okkar. Það er af þessum ástæðum sem kirkjan sér í Evkaristíunni sjálfan kjarna lífs síns og ber fyrir brjósti að boða öllum í tíma og ótíma (spr. 2Tm 4. 2) að Guð er elska. Einmitt sökum þess að Kristur er orðinn okkur að sannleiksfæðu, þá snýr kirkjan sér til sérhvers karls og konu og býður þeim að þiggja endurgjaldslaust gjöf Guðs.

05.04.09

  06:18:07, Skrásetjari: Jon Valur Jensson   , 181 orð  
Flokkur: Fósturvernd, Siðferði og samfélag, Unborn children – abortion

Dauðapilla gegn lífinu – hér á Íslandi?!

"Þvert gegn landslögum hafa nýlega upp fundnar aðferðir til deyðingar fósturs allt að níu vikna gömlu* verið innleiddar hér í verki af þeim, sem hvorki er sýnt um að bera slíkar ákvarðanir undir þing né þjóð. En þeir, sem láta sig þetta mál varða, munu ekki láta það yfir þjóð okkar ganga, að það fái ómótmælt framgang, andstætt bæði lögum okkar og siðferði." Þannig reit undirritaður í þessari vefgrein: Fósturdráp í heimahúsum? Ný árás á málstað lífsins, 5. jan. 2008 (með umræðum á eftir), og fekk hún yfir 900 heimsóknir þann daginn. Henni var fylgt eftir með annarri grein: Dauðapillan RU486 og löglaus notkun hennar (einnig á Moggabloggi höfundar, 6. jan. 2008); mjög athyglisvert og fréttnæmt efni er að finna á báðum vefslóðunum.

Vert er að halda þessum skrifum til haga hér og fylgjast grannt með því, hvort enn sé verið að halda þessari dauðapillu að íslenzkum konum. –JVJ.

30.03.09

Andtrúarróttæklingar höfðu hálfan sigur á landsfundi undarlegra 'íhaldsmanna'

Hér var fyrir helgina rætt um róttæka tillögu lausungarhyggjumanna (líberalista) í drögum að ályktun fjölskyldunefndar Sjálfstæðisflokksins. Annað tveggja alvarlegustu atriðanna þar, þ.e.a.s. að svipta presta hjónavígslurétti, var fjarlægt úr tillögunni í meðförum fjölskyldunefndar (á morgunfundi á föstudag), en úrslitin urðu þó ekki endanlega ljós, fyrr en sú meðferð málsins var staðfest af sjálfum landsfundinum.

Áfram er þó keyrt á það, að ein og söm hjúskaparlög skuli lögtekin fyrir bæði homma og lesbíur eins og fyrir venjuleg hjón. Verði þetta einhvern tímann að veruleika á hinu háa Alþingi – þrátt fyrir sáralitla ásækni samkynhneigðra í staðfestingu samvistar (frá árinu 1996) – þá má búast við því, að landsmönnum verði þaðan í frá uppálagt að tala um 'hjónabönd' samkynhneigðra og um slík pör sem hjón. Alltjent myndi það þá komið inn í alla lagabálka, sem snerta hjónabandið, ennfremur í skólabækur o.s.frv.

Öll færslan - smellið hér til að lesa alla færsluna »

28.03.09

Barizt um hjónabandið á landsfundi Sjálfstæðisflokksins

Mjög alvarleg tillaga var hluti af drögum að ályktun fjölskyldunefndar Sjálfstæðisflokksins, sem fyrir lágu, þegar landsfundur kom saman í fyrradag. Tvenns konar árás á kristinn sið og kristin gildi felst í þeim:
1) að hjónavígsluréttur verði tekinn af kirkjum og trúfélögum; 2) að hjónabandið verði formlega "afkynjað" – látið ná jafnt yfir hjónaband karls og karls eða konu og konu eins og hið náttúrlega hjónaband karls og konu. Að þvílík tillaga komi fram á flokksþingi þeirra, sem íhaldssamastir eru taldir á stjórnmálasviðinu, sýnir ljóslega, hversu alvarlega er sótt að kristnum grundvallargildum á þeim vettvangi.

Á landsfundinum er uppi virkt og vonandi árangursríkt varnarstarf gegn þessari tillögu, en endanleg ákvörðun fundarins verður þó ekki ljós, fyrr en allsherjarfundur hinna 1900 landsfundarfulltrúa hefur tekið afstöðu til tillagna þessarar róttæku fjölskyldunefndar.

Drögin eru þannig:

Öll færslan - smellið hér til að lesa alla færsluna »

25.03.09

Kristnir málefnahópar í stjórnmálaflokkunum

Nú er stefnt að stofnun þeirra í öllum flokkum og framboðum. Sá fyrsti er nýlega til orðinn í Frjálslynda flokknum, og leiðir hann hinn góðkunni Guðsteinn Haukur Barkarson. Í Sjálfstæðisflokknum hefur verið unnið að stofnun slíks hóps frá 7. febrúar, með útsendu bréfi til ýmissa kristinna flokksmanna, sem birt var áðan í þessari vefgrein: Hvatningarbréf um stofnun kristins málefnahóps í Sjálfstæðisflokknum. Vísast hér með til ýtarlegrar greinargerðar fyrir þessu máli í því bréfi. Þið, sem áhugann hafið, vísið öðrum á þetta eða áframsendið það! En nú er Sjálfstæðisflokks-fólkið í slíkum málefnahópi einmitt að fara að hittast fyrir landsfundinn, sem hefst síðdegis á morgun.

Öll færslan - smellið hér til að lesa alla færsluna »

10.03.09

  03:01:31, Skrásetjari: Jon Valur Jensson   , 594 orð  
Flokkur: Fósturvernd, Siðferði og samfélag, Stofnfrumurannsóknir og tæknifrjóvgun (IVF)

Kardináli fordæmir ákvörðun Obama forseta að afturkalla bann við stofnfrumurannsóknum á nýjum fósturvísum

Forseti Bandaríkjanna tilkynnti í gær, að hann hafi aflétt banni Bush yngra forseta við því, að ríkisfé sé notað til rannsókna og nýtingar stofnfrumna úr frumfóstrum. Samdægurs kom viðbragð frá Justin Rigali kardinála:

"Ný stjórnvaldstilskipun (executive order) Obama forseta um fósturvísis-stofnfrumurannsóknir er hryggilegur sigur stjórnmála yfir vísindum og siðfræði.

Öll færslan - smellið hér til að lesa alla færsluna »

08.03.09

Spennandi fyrirlestur um hinn afar útbreidda kristindóm í Asíu í fornöld og á miðöldum

Fagnaðarefni er, að Ólafur Haukur Árnason, sagnfræði- og latínunemi, hyggst deila með okkur þekkingu sinni og rannsóknum á útbreiðslu kristninnar í Asíu, allt til Kyrrahafs og Indlandshafs og lengst inn í Mið-Asíu, ekki nú á dögum, heldur strax í fornöld og á miðöldum. Þar kemur bæði kaþólska kirkjan, sú orþódoxa og ýmsar frávikskirkjur, einkum Nestoringa, við sögu.

Það er mörgum eins og óvænt opinberun að lesa um þróttmikið starf kirkjunnar í Asíu langt fram á miðaldir, en þarna var vagga kristindómsins, við Miðjarðarhafið. Þaðan breiddist hún ört út austur á bóginn, með ótrúlegum árangri, meðan okkar "gamla Evrópa" var lengi vel að miklu leyti heiðin nema í suðlægustu löndum, á Spáni, Suður-Gallíu, Ítalíu og Grikklandi eða réttara sagt austrómverska keisaradæminu.

Fyrirlesturinn hefst kl. 20, mánudaginn 9. marz, að Hávallagötu 16, í safnaðarheimili kaþólsku kirkjunnar. Kaffihlé verður og veitingar og öllum frjálst að bera fram fyrirspurnir og leggja þar sitt til málanna.

Ólafur Haukur Árnason á mjög góða grein um þetta efni: 'Róm og Bagdad: Kristin trú í Asíu á tímum mongólska heimsveldisins', í nýútkomnu hefti af Merki krossins, tímariti kaþólsku kirkjunnar, en þrátt fyrir nafn þeirrar greinar spannar hún í raun yfir miklu víðtækara svið í tíma og rúmi, frá fornöld og til trúboðsferða kaþólskra manna á miðöldum.

Ólafur hefur á ýmsum vettvangi sýnt sig að vera efnilegur ...

Öll færslan - smellið hér til að lesa alla færsluna »

15.02.09

  04:00:25, Skrásetjari: Jon Valur Jensson   , 207 orð  
Flokkur: Siðferði og samfélag, Kristindómur og stjórnmál

Rætt um kristindóm og stjórnmál á Omega

Þáttur um þetta efni, m.a. um fyrri tilþrif kirkjunnar á sviði þjóðfélagsmála og hvort kristnir menn nú á dögum eigi að gefa sig í stjórnmálabaráttu, var frumbirtur á Omega-sjónvarpsstöðinni á fimmtudag og í endursýningum áfram, í 5. sinn (það síðasta í bili) í dag, þriðjudag, kl. 13:00. Þar sit ég, Jón Valur Jensson guðfræðingur, fyrir svörum í hálftíma þætti hjá Guðsteini Hauki Barkarsyni, þekktum Moggabloggara, sem nýlega gekk í Íslensku Kristskirkjuna.

Öll færslan - smellið hér til að lesa alla færsluna »

  03:32:34, Skrásetjari: Jon Valur Jensson   , 193 orð  
Flokkur: Trúarbrögð í innbyrðis samskiptum og við veröldina, Kenning kaþólskrar kirkju

Bergmál af vindmyllubaráttu veraldarvanra blaðamanna við meinta Gyðingaandúð Rómarkirkjunnar

Undarlegur er lesturinn í Morgunblaði þessa sunnudags, en þangað hefur bergmálið borizt af málflutningi nokkurra veraldarhyggju-fjölmiðla. Nú er Karl Blöndal ritstjóri mjög vandaður penni og treystir ekki að óreyndu fjölmiðlum eins og Der Spiegel og International Herald Tribune, en ætti að gera sér grein fyrir því, að meirihluti vestrænnar blaðamannastéttar tekur afar tortryggna og ekki ósjaldan neikvæða afstöðu gagnvart páfadæminu og jafnvel hinni kaþólsku kirkju.

Grein Karls: 'Býsnavetur Benedikts', geldur þess, að heimildir hans eru einhliða og illa upplýstar um kaþólska kenningarhefð. Því hefur honum missýnzt í þessu efni og veitzt erfitt að láta hinn gagnrýnda Benedikt páfa njóta sannmælis og viðurkenningar sakleysis síns gagnvart ásökunum sumra Gyðinga vegna fáránlegrar afstöðu eins biskups til fjöldamorðanna á Gyðingum á valdatíma nazismans.

Ásökunarefnin á hendur páfanum í þessari grein, sem og ályktanirnar, eru í senn þyngri og léttferðugri en svo, að við þeim verði þagað. Því má vænta hér meiri skrifa um málið.

26.12.08

  10:57:54, Skrásetjari: Ragnar Geir Brynjólfsson   , 75 orð  
Flokkur: Stjórnmálarýni, Kaþólska kirkjan á Íslandi, Páfinn

Elín Flygenring skipuð sendiherra Íslands hjá Páfagarði

Fréttaþjónustan Zenit.org hefur greint frá því að Elín Flygenring hafi verið skipaður sendiherra Íslands hjá Páfagarði. Benedikt páfi tók á móti henni og flutti við það tækifæri ávarp til hennar og íslenskra stjórnvalda. Fyrirsögn ávarpsins var: „Verndið og styðjið mannréttindi heima og að heiman“. Ávarp páfa til íslenskra stjórnvalda er að finna í heild sinni hér: [Tengill]

23.12.08

  19:58:49, Skrásetjari: Ragnar Geir Brynjólfsson   , 324 orð  
Flokkur: Helgir menn, Kaþólska kirkjan á Íslandi

Ný íslensk stytta af Þorláki helga

Fyrir um einu ári lauk listakonan Sigga á Grund við gerð útskorinnar styttu af Þorláki helga. Styttan er um 47 sm. há og skorin út úr sérvöldum kjörviði. Þeir sem þekkja til Siggu á Grund vita að hún er útskurðarmeistari sem hefur gert marga kosta- og kjörgripi sem bera vitni nákvæmni, einstöku handbragði og listrænu innsæi. Við Sigga erum fyrrum sveitungar og nágrannar og hún féllst góðfúslega á að taka þetta verkefni að sér að minni beiðni. Ástæða þess að ég réðst í þetta framtak var sú að mér þótti vanta styttu af Þorláki helga sem hægt væri að gera afsteypur af. Þó til sé stytta af Þorláki helga í Kristskirkju í Landakoti þá er hún of stór til að hún henti sem frummynd fyrir afsteypu.

Öll færslan - smellið hér til að lesa alla færsluna »

20.12.08

  09:17:16, Skrásetjari: Jón Rafn Jóhannsson, 188 orð  
Flokkur: Hugleiðingar

Benedikt páfi XVI – Heilagur Jósef: Fyrirmynd í hlustun (© L'Osservatore Romano)

Þögn heilags Jósefs má rekja til þagnar íhugunar hans á leyndardómum Guðs í fullkomnum fúsleika andspænis vilja Guðs. Með öðrum orðum er þögn heilags Jósefs ekki ummerki innri tómleika heldur þvert á móti fyllingar þeirrar trúar sem hann ber í hjarta sínu og stjórnar öllum hugsunum hans og verkum. Þetta er þögn sem gerir Jósef ásamt Maríu kleift að hlýða Orði Guðs sem kunngert er í heilögum Ritningum og sem blasir við þeim í öllum atvikum í lífi Jesú. Þetta er þögn sem rekja má til óaflátanlegrar bænar, blessunarbænum til handa Drottni, tilbeiðslu á heilögum vilja hans og fullkomnu trausti á fyrirhugun hans.

Við skulum láta það eftir okkur að „smitast“ af þögn heilags Jósefs. Við þörfnumst slíks svo átakanlega í heimi sem iðulega er allt of hávær og ófús til að hlusta af athygli á raust Guðs. Á þessum tíma þegar við undirbúum okkur fyrir jólin skulum við leggja rækt við innri einbeitingu svo að við getum fagnað Jesú í lífi okkar.

09.12.08

  10:32:08, Skrásetjari: Jón Rafn Jóhannsson, 886 orð  
Flokkur: Hugleiðingar

Um þöggun

Orðið þöggun hefur óvænt skotið upp kollinum í þjóðfélagsumræðunni að undanförnu. Ekki er ólíklegt að okkar ástkæra föðurland skipi einstakan sess meðal þjóða í hinum vestræna heimi. Helstu fjölmiðlar þjóðarinnar eru í höndum sömu hagsmunaaðilana að Rúv undanskildu sem að nafninu til á að vera í þjóðareign. En almennt talað hefur hin „óháða“ stétt fréttamanna lotið ofurvaldi þöggunarinnar á umliðnum árum. Meðal annars lýsir þetta sér í því að ef sérfræðingar voguðu sér að benda á veikleika undirstaða íslenska fjármálaviðundursins brugðust fjölmiðlarnir í heild við slíkri gagnrýni af vanþóknun. Ummæli líkt og „þeir þarna í Háskólanum þurfa nú að fara að athuga sinn gang!“ glumdu við í þöggunaráráttu fjölmiðlavaldsins. Ef erlendir fjölmiðlar voguð sér að gagnrýna útrásarvíkingana glumdi hneykslunin við í öllum fjölmiðlum þöggunarvaldsins. Frægt er þegar háttvirtur utanríksráðherra tókst á hendur sérstaka ferð til Danmerkur s. l. vor ásamt fríðu föruneyti útrásarvíkinga til að sannfæra Dani um að hið íslenska „wirtschaftswunder“ stæði styrkum fótum. Ég minni á að þetta var einungis nokkrum mánuðum fyrir ragnarökin miklu. Ég minnist myndskeiðs úr kvikmynd um David Cooperfield eftir Charles Dickens. Það var tekið á geðveikrahæli þar sem þögnin ein ríkti. Skyndilega tók einn hinna sjúku að æpa og það var eins og við manninn mælt: Allir hinir tóku undir hróp hans.

Öll færslan - smellið hér til að lesa alla færsluna »

08.12.08

  01:35:52, Skrásetjari: Jon Valur Jensson   , 1988 orð  
Flokkur: Biblíufræði

"Ég segi yður: ef þessir þegja, munu steinarnir hrópa"

Það er eins og sumir kristnir menn ímyndi sér, að það að lifa kristnu trúarlífi eigi að vera eitthvað settlegt og pent og að alls ekki megi hafa hátt! En þegar farið er í Biblíulykilinn frábæra (Hið ísl. Biblíufélag, Rvík 1984, 1692 bls.) eða orðaleit á biblian.is, þá kemur nú í ljós, að það er hið eðlilegasta mál fyrir þá, sem hafa lifandi trú, að hrópa upp, bæði í áköllum til Guðs um miskunn og hjálp (fjöldi dæma) og í vitnisburði um hans máttarverk (Lúk. 1.42) og til að kalla menn til trúar (dæmi: Jóh. 1.15: "Jóhannes vitnar um hann og hrópar: "Þetta er sá sem ég átti við þegar ég sagði: Sá, sem kemur eftir mig, hefur verið á undan mér, því að hann var fyrri en ég“").

Sjálfur Jesús hrópar, ekki aðeins við andlát sitt (Mt. 27.50), heldur og í boðun sinni þegar hann kallaði: "Hver sem eyru hefur að heyra, hann heyri" (Lúk. 8.8), og hann hrópar á Lazarus að koma út úr gröf sinni (Jóh. 11.43), og þessi orð hrópaði hann: "Sá, sem trúir á mig, hann trúir ekki á mig, heldur á þann sem sendi mig; og sá, sem sér mig, hann sér þann, sem sendi mig. Ég er ljós í heiminn komið, til þess að hver, sem á mig trúir, sé ekki í myrkrinu ..." o.s.frv. (Jóh. 12.44 o.áfr.).*

Hættum að vera settleg og pen og feimin við að hrópa!

----

Þetta var innlegg mitt hjá Þórarni bloggvini mínum, á þarfri vefsíðu hans. Hugleiðum aðeins frekar þessi mál. Það má heita síendurtekið þema í Gamla testamentinu, að hinir trúuðu, sem í nauðum eru staddir, hrópi til Guðs um hjálp. Allir lesendur Davíðssálma kannast við þetta (t.d. í hinum magnaða 107. sálmi). Í Sálmunum kemur orðið 'hrópa' 40 sinnum fyrir, þar af aðeins tvisvar í neikvæðri merkingu (40.16, 70.4) og tvisvar um hróp þeirra, sem enga hjálp fá vegna ranglætis síns (18.42). En samtals kemur orðið 128 sinnum fyrir í Gamla testamentinu og 45 sinnum í því Nýja (þessum stöðum til viðbótar eru margir aðrir, þar sem orðið 'kalla' er notað). Hér eru nokkrir dæmigerðir textar og ýmsir hinna þekktari:

Öll færslan - smellið hér til að lesa alla færsluna »

25.11.08

Jón Arason á aftökustaðnum

Þrátt fyrir meint frjálslyndi sitt í trúarefnum og jafnvel únitarisma* framan af var hinn mikli skáldjöfur Matthías Jochumsson (1835–1920) afar jákvæður gagnvart kaþólskri trú og kirkju, þar með talið trúararfi hennar hér á landi. Öðrum samtímamönnum fremur í Þjóðkirkjunni lúthersku átti hann giftudrjúgt samstarf við kaþólsku kirkjuna, og sér þess umfram allt stað í ljóðakverinu Kaþólskir sálmar, sem útgefið var fyrir 100 árum, í Reykjavík 1908, 63 bls. að stærð. Það var að öllu leyti hans þýðingarverk, þótt hans væri þar ekki getið sem þýðanda; mun hann sjálfur hafa viljað halda því leyndu. Margt af sálmunum í þessu ljóðakveri er enn sungið við raust í kaþólskum kirkjum landsins, m.a. á stórhátíðum.** Meðal sálmanna þar er Hljóða nótt, heilaga nótt, sem við kaþólskir syngjum um jólin í stað Heims um ból, sem er ekki jafn-nákvæm þýðing Sveinbjarnar Egilssonar á sama sálmi. En söguástundun var Matthíasi einnig í blóð borin (sbr. rit hans Smáþættir um byggingu Íslands og vora fornu siðmenningu, Rv. 1913), og þar kom hann eins og Jón Sigurðsson forseti sannarlega auga á það, hve persóna Jóns biskups Arasonar rís yfir flestar aðrar í sögu okkar og sjálfstæðisbaráttu. Leikrit hans Jón Arason, harmsöguleikur í fimm þáttum, kom út hjá Ísafold árið 1900. Leikritið gerist allt árið 1550, á Hólum, Alþingi, í Skálholti, aftur á Hólum, á Sauðafelli og lokaþátturinn í Skálholti. Í leikverkinu eru allnokkur ljóð, en þetta, sem hér fer á eftir, er sjálfstætt ljóð og segir mikla sögu. Jón Arason á aftökustaðnum Allir orð mín heyri, eg vil kveða' og syngja, grípa lands míns gígju, gamla skapið yngja. Hátt í hinzta sinni hljómi málið goða; yfir svik og sorgir slæ ég morgunroða.

Öll færslan - smellið hér til að lesa alla færsluna »

28.10.08

  21:34:48, Skrásetjari: Ragnar Geir Brynjólfsson   , 279 orð  
Flokkur: Kirkjuárið, Kenning kirkjunnar

Allra heilagra messa og allra sálna messa

Allra heilagra messa er 1. nóvember nk. og allra heilagra messa er 2. nóvember. Á allra heilagra messu verða vökumessur í Kristskirkju í Landakoti og Maríukirkju í Breiðholti. Messan í Kristskirkju hefst kl. 18 og í Maríukirkju kl. 18.30.

Eigum við að biðja fyrir framliðnum?

„Biblían kennir að það sé rétt og hjálpsamlegt að biðja fyrir þeim sem dánir eru. Sálir þeirra sem deyja í náð Guðs en eiga eftir að hreinsast af syndum sínum dvelja um hríð í hreinsunareldi.

Öll færslan - smellið hér til að lesa alla færsluna »

14.10.08

  13:52:20, Skrásetjari: Jón Rafn Jóhannsson, 1657 orð  
Flokkur: Hugleiðingar

Um aðskiljanlega náttúru knattleikja – hugleiðing

Á umliðnu sumri var handknattleikur mikið til umræðu meðal þjóðarinnar, einkum vegna velgengni íslenska landsliðsins í Beijing. Bolti og handknattleikur gegnir einnig mikilvægu hlutverki í boðskap Jesú. Drottinn greip til dæmisagna í ríkum mæli eins og við sjáum í guðspjöllunum. Á grísku er orðið dæmisaga „parabole,“ en bókstaflega þýðir orðið: „með bolta.“ Jesús varpar þannig boðskap sínum til okkar líkt og bolta í handknattleik. Við getum þannig gripið boðskapinn eða boltann á lofti og í þessu sambandi eru viðbrögð okkar mikilvæg, rétt eins og gengur í öllum öðrum handknattleikjum. Í þessu samhengi getum við sem best rætt um „veraldlegan“ og „guðdómlegan“ knattleik.

Öll færslan - smellið hér til að lesa alla færsluna »

08.10.08

  10:10:58, Skrásetjari: Jón Rafn Jóhannsson, 956 orð  
Flokkur: Hugleiðingar

Feitu árin og mögru árin – hugleiðing

Ég minnist þess hversu mjög mér var brugðið þegar ég var að bera út Alþýðublaðið forðum daga og las risafyrirsögn á forsíðunni um að við (Íslendingar) værum að fara fram af hengifluginu. Þetta var á sólbjörtum morgni og þrátt fyrir að ég skildi ekki orðin til fulls var mér ljóst að þetta væri slæmt: Afar slæmt! Það var hnugginn blaðaburðarstrákur sem kom heim þennan morgun til mömmu sinnar sem reyndist erfitt að kreista bros fram á andlitið. Þetta var þegar stjórn Hermanns Jónassonar hrögglaðist frá vegna aðsteðjandi efnahagsörðugleika.

Öll færslan - smellið hér til að lesa alla færsluna »

01.10.08

  18:49:59, Skrásetjari: Ragnar Geir Brynjólfsson   , 195 orð  
Flokkur: Erlendar fréttir úr heimi kirkjunnar

Evrópuþingið ályktar gegn ofsóknunum á Indlandi

Evrópuþingið samþykkti 24. sept. sl. ályktun þar sem það fordæmdi ofsóknirnar gegn kristnum í Orissa á Indlandi. Þetta var liður í undirbúningi viðræðna ESB við Indland sem hófust í Frakklandi þrem dögum síðar. Patríarkinn af Konstantínópel, Bartólómeus I ávarpaði þingið sama dag og ræddi um gildi trúarinnar fyrir Evrópu og Tyrkland og möguleikanum á að byggja brýr milli menningarheima fyrir tilstilli trúarbragðanna. Nokkrir þingmenn Evrópuþingsins úr röðum græningja, frjálslyndra og sósíalista gengu af þingi til að mótmæla ávarpi patríarkans. Belgískur þingmaður úr röðum sósíalista sem hafði forystu fyrir útgöngunni gagnrýndi patríarkann sem og Benedikt páfa XVI fyrir að halda fram að siðferðisleg gildi Evrópu væru kristileg siðferðisgildi. Hún bætti við að ef ekki væri gætt aðskilnaðs ríkis og trúarbragða gætu ofbeldisöfl gengið á lagið. Á þessum forsendum hvatti hún aðra þingmenn til að sniðganga ávarp patríarkans. [Tengill]

Benedikt XVI páfi og Bartólómeus I

28.09.08

  20:40:48, Skrásetjari: Ragnar Geir Brynjólfsson   , 97 orð  
Flokkur: Erlendar fréttir úr heimi kirkjunnar

Anglíkanska kirkjan: Ræða erkibiskups Kantaraborgar í Lourdes veldur titringi

Nýleg ræða erkibiskupsins af Kantaraborg Rowan Williams sem hann hélt í Lourdes í Frakklandi hefur valdið titringi meðal hóps anglíkana sem vilja halda sig við hefðir mótmælenda. Erkibiskupinn talaði m.a. um birtingar meyjarinnar í Lourdes og vitnaði til hennar sem móður Guðs. Hann fór einnig lofsamlegum orðum um dýrlingana og talaði um gott fordæmi þeirra. Sjá hér: [Tengill] Talsmaður hópsins sagði hegðun erkibiskupsins vera harmræna og visaði til hans sem strengjabrúðu páfa.

  20:19:25, Skrásetjari: Ragnar Geir Brynjólfsson   , 86 orð  
Flokkur: Erlendar fréttir úr heimi kirkjunnar

Indland: Systraheimili Kærleiksboðberanna brennt

Ofstækismenn úr röðum hindúa brenndu í síðustu viku systraheimili Kærleiksboðberanna af reglu Móður Teresu í Kandhamal svæði í Orissa á Indlandi. Á fimmtudagskvöldið var réðust um 700 manns vopnaðir öxum, sverðum og járnstöngum á systraheimilið og kveiktu í því. Systurnar voru flúnar og sakaði því ekki. Ofbeldisalda gegn kristnum hefur riðið yfir Indland í kjölfar vígs á róttækum leiðtoga hindúa sem skæruliðar kommúnista hafa lýst á hendur sér. [Tengill]

21.09.08

  22:10:33, Skrásetjari: Ragnar Geir Brynjólfsson   , 46 orð  
Flokkur: Fjölmiðlarýni

Indland: Kristnir menn neyddir til að gerast hindúar

Í kjölfar ofbeldisöldunnar í Orissa á Indlandi sem braust út í síðasta mánuði hafa hundruð kristinna verið neydd til að afneita trúnni og játa hindúatrú. [Tengill] Sjónarvottur greinir frá því að ungur kaþólskur maður hafi verið grafinn lifandi. [Tengill]

18.09.08

  20:11:39, Skrásetjari: Ragnar Geir Brynjólfsson   , 131 orð  
Flokkur: Erlendar fréttir úr heimi kirkjunnar

Benedikt XVI páfi: Trúin tryggir frelsi og sjálfstæði

Asianews.it - Páfagarði. „Sannur aðskilnaður kirkju og ríkis felur ekki í sér að trúnni sé hafnað heldur það að trúin verður trygging frelsis okkar og sjálfstæðis í veraldlegum málum.“ Þetta sagði Benedikt páfi XVI í Páfagarði eftir heimsókn sína til Lourdes í Frakklandi og bætti við að fyrst Jesús segði að gefa ætti keisaranum myntina með mynd keisarans að þá ættu fingraför herra lífsins að finnast á hjarta mannsins.

Hann talaði hlýlega um Frakkland þar sem menningarleg þróun hefði verið nátengd kirkjunni allt frá 2. öld. „Og það er athyglisvert að í þessu umhverfi kom fram þörfin fyrir heilbrigðan aðskilnað stjórnmála og trúarlegra mála.“ [Tengill]

17.09.08

  21:11:14, Skrásetjari: Ragnar Geir Brynjólfsson   , 132 orð  
Flokkur: Erlendar fréttir úr heimi kirkjunnar

Indland: Ofbeldið gegn kristnum heldur áfram og breiðist út

Asianews.it - Mumbai. Ofbeldisaldan gegn kristnum sem byrjaði í Orissa á Norð-Austur Indlandi 23. ágúst hefur nú breiðst út til Madya Pradesh, Karnataka og Kerala. Snemma í morgun var ráðist á kirkju og reynt að kveikja í henni og einnig réðst hópur manna með loftbyssur á Karmelklaustur.

14. september var ráðist á 20 kirkjur. Róttækir hindúar kenna kristnum um morð á hindúaleiðtoga sem skæruliðar maóista réðu af dögum. Í kjölfarið hefur markvisst verið ráðist á kirkjur, skóla, félagsmiðstöðvar og heimili. 45 hafa látið lífið í Orissa, 18.000 eru sagðir sárir. 5 er saknað. 56 kirkjur, 11 skólar og 4 skrifstofur hafa verið eyðilagðar. 50.000 manns eru á flótta og af þeim eru um 40 þús. í felum í skógum. 12.000 eru í flóttamannabúðum. [Tengill]

15.09.08

  21:36:44, Skrásetjari: Ragnar Geir Brynjólfsson   , 82 orð  
Flokkur: Kaþólska kirkjan á Íslandi

Riftún Ölfusi: Krossganga á krossmessu

Sunnudaginn 14. september sl. á krossmessu á hausti var hin árlega pílagrímsganga gengin frá hringtorginu við Hveragerði að kapellu hins helga kross í Riftúni í Ölfusi. Þetta er um 6 km. ganga. Að þessu sinni var veðurútlitið ekki gott og því gengu aðeins 11 manns alla leiðina en fjölmennt var í messunni og var kapellan þéttsetin. Krossinn uppi á hamrinum brotnaði í óveðri síðasta vetur en gert hefur verið við hann en hann er nú nokkru styttri en hann var.

14.09.08

  09:47:26, Skrásetjari: Jón Rafn Jóhannsson, 311 orð  
Flokkur: Hugleiðingar

Upphafning hins heilaga kross (14. september): Hugvekja tileinkuð heilögum Efraím hinum sýrlenska (um 306-373), djákna og kirkjufræðara

„Og þegar ég verð hafinn upp frá jörðu, mun ég draga alla til mín“ (Jh 12. 32)

Frá og með þessari stundu hefur krossinn hrakið alla skugga á brott og sannleikurinn tekið að ljóma, eins og Jóhannes postuli segi: „Hið fyrra er farið . . . Sjá, ég gjöri alla hluti nýja“ (Opb 21. 4-5). Dauðinn hefur verið sviptur bráð sinni, hinir fjötruðu í víti endurleystir: Maðurinn er orðinn frjáls. Drottinn ríkir og sköpunin fagnar. Krossinn hefur sigrað og allar þjóðir, kynkvíslir, tungur og lýðir (Opb 7. 9) koma til að tilbiðja hann. Í krossinum finnum við fögnuð okkar og hrópum með heilögum Páli: „En það sé fjarri mér að hrósa mér af öðru en krossi Drottins vors Jesú Krists“ (Gl 6. 14). Krossinn varpar ljósi sínu á alla heimsbyggðina. Hann hrekur myrkrið á brott og safnar þjóðunum saman í kærleika í kirkjunni í einni trú og einni skírn, frá vestri til austurs, úr norðri og frá höfunum. Hann stendur í miðju heimsins þar sem hann rís á Krosshæðinni.

Öll færslan - smellið hér til að lesa alla færsluna »

13.09.08

  13:43:27, Skrásetjari: Jon Valur Jensson   , 78 orð  
Flokkur: Fósturvernd, Siðferði og samfélag, Unborn children – abortion

Greinar sem snerta lífsverndarmál

Rétt er að benda á eftirfarandi nýlegar greinar mínar sem taka með einum eða öðrum hætti á lífsverndarmálunum í samtíð okkar.

Hvað má sýna unglingum – sannleikann eða fela hann?

Dauðarefsing ófæddra; eða eru þau partur af móðurinni?
og (um varaforsetaefni demókrata): Joe Biden höfðar ekki sterkt til trúaðra kaþólikka nema síður sé! (allkröftug umræða þar um lífsverndarmál).

11.09.08

  21:29:59, Skrásetjari: Ragnar Geir Brynjólfsson   , 54 orð  
Flokkur: Erlendar fréttir úr heimi kirkjunnar

Ítalía: Maður í mótmælastöðu fyrir utan nunnuklaustur

Indcatholicnews.com - Montecassino. Vonsvikinn Ítali hóf mótmælastöðu fyrir utan nunnuklaustur fyrir sunnan Róm eftir að fyrrverandi kærasta hans gekk í klaustrið. Daniel Briatore 21 árs gamall hengdi borða á klausturvegginn í von um að æskuástin hans sem sagði honum upp mánuði fyrr myndi snúa aftur. [Tengill]

10.09.08

  20:39:35, Skrásetjari: Ragnar Geir Brynjólfsson   , 59 orð  
Flokkur: Erlendar fréttir úr heimi kirkjunnar

Filippseyjar: Hart tekist á um frumvarp sem gengur gegn lífsgildum

Asianews.it - Manila. Á Filippseyjum er nú hart tekist á um frumvarp sem miðar að því að draga úr fjölgun þjóðarinnar með getnaðarvörnum og fósturdeyðingum. Kirkjunnar menn hyggjast gefa út DVD disk sem kynnir málstað hennar og safna einni milljón undirskrifta gegn frumvarpinu sem þeir segja að gangi gegn lífsgildum. [Tengill]

06.09.08

  09:29:19, Skrásetjari: Jón Rafn Jóhannsson, 44 orð  
Flokkur: Bænalífið

Bæn í minningu herra Sigurbjörns Einarssonar biskups.

Drottinn vor og Guð, ljós vort og yndi. Leið herra Sigurbjörn Einarsson biskup inn til hvíldar þinnar himnesku gleði til að dvelja þar að eilífu í fullsælu hinna heilögu í sigrandi kirkju himnanna! Drottinn, heyr vora bæn. Amen

04.09.08

  21:41:40, Skrásetjari: Ragnar Geir Brynjólfsson   , 205 orð  
Flokkur: Erlendar fréttir úr heimi kirkjunnar

Indland: Ofsóknirnar gegn kristnum í Orissa fjara út

Asianews.it - Róm. Ofsóknirnar gegn kristnum í Orissa á Norð-Austur Indlandi eru að fjara út en svæðinu er lokað og aðeins stjórnarerindrekar og lögreglumenn fá að fara þangað. Allt sem merkt var krossi virðist hafa verið ráðist á. Ofsóknirnar brutust út í kjölfar morðs á róttækum hindúaleiðtoga en hann var veginn af skæruliðum kommúnista.

Edward Sequeira

Þrátt fyrir það brutust út að því er virðist skipulagðar ofsóknir gegn kristnum í héraðinu. Engin ríkisstjórn hefur fordæmt ofbeldið. Aðeins örfáir ráðamenn hafa gert það svo sem utanríkisráðherra Ítalíu. Ráðamenn í Páfagarði hafa bent á að þetta sé ein birtingarmynd kristnifælni sem leitast við að afneita kristinni arfleifð. Margir friðarsinnar og félagasamtök sem gjarnan eru fljótir til að vernda aðra hópa, minnihlutahópa eða dýr í útrýmingarhættu hafa kosið þögnina í þetta skipti. Hugsanlega óttast þeir að á bakvið ásakanir róttækra hindúa um sálnaveiðar kristinna liggi sannleikskorn. Ítalskir biskupar hafa boðað að morgundagurinn 5. september skuli vera helgaður bænum og föstum fyrir kristnum í Orissa. [Tengill]

31.08.08

  17:45:38, Skrásetjari: Ragnar Geir Brynjólfsson   , 104 orð  
Flokkur: Lífsvernd, Önnur trúarbrögð

Indland: 10 milljóna stúlknafæðinga er saknað úr fæðingartölum

Catholicculture.org - Bangalore. 10 milljóna stúlknafæðinga er saknað úr fæðingartölum á Indlandi. Einkasjúkrahús framkvæma kyngreiningu fóstra þrátt fyrir bann stjórnvalda. Samkvæmt siðum Hindúa getur faðir ekki orðið hólpinn nema sonur veiti honum síðustu smurningu og kvöð um heimanmund fyrir stúlkur gerir að verkum að stúlknafóstur eru frekar deydd. Nýlega kom upp mál þar sem grunur leikur á að ung stúlka hafi verið myrt af því hún neitaði að láta deyða stúlkufóstur sem hún gekk með. [Tengill]

1 ... 5 6 7 ...8 ... 10 ...12 ...13 14 15 ... 46

Síðustu pistlar

Kirkju.net er óháð vefrit sem inniheldur aðallega efni tengt kaþólskri trú en einnig um trúmál almennt. Markmiðið er að miðla fróðleik og stuðla að skoðanaskiptum og umræðu innan kaþólsku kirkjunnar á Íslandi sem og að kynna kaþólsku kirkjuna fyrir þeim sem utan hennar eru. Aðalsíða vefritsins sækir pistla inn á bloggsíður og skrifa höfundar hvers bloggs pistla sem hafa kaþólskt eða annað trúarlegt efni sem meginþema. Skoðanir settar fram í pistlunum eru höfundanna sjálfra og ber ekki að túlka þær sem skoðanir trúfélaga eða annarra bloggara. Höfundar bera ábyrgð á efni sem þeir birta á sínu bloggi. Athugasemdir við pistlana eiga að vera á íslensku, málefnalegar og fullt nafn höfundar á að koma fram. Athugasemdum er ritstýrt af höfundi hvers bloggs fyrir sig. Gestapennar innan eða utan kaþólsku kirkjunnar eru einnig velkomnir að senda inn greinar sem eru birtar undir „Ýmsir höfundar.“

Leit

Flokkur

Sr. Denis O'Leary

Kirkjuvefbók Ragnars

Jón Valur Jensson

Ýmsir höfundar

Jón Rafn Jóhannsson

Kirkju.net


Fatal error: Call to a member function flag() on boolean in /home/n982112/public_html/inc/widgets/widgets/_item_info_line.widget.php on line 215